Vuçiç i jep mandatin Kryeministrit të ri, reagimet: Nxitës i dialogut apo zbatues i vullnetit të Presidentit?
Nga lëvdatat se si një figurë jopartiake do të nxisë dialogun në shoqëri, e deri te vlerësimet se do të udhëheqë një Qeveri të njëjtë dhe do të zbatojë urdhrat e Presidentit të Serbisë, Aleksandar Vuçiç, janë reagimet pas mandatit që Vuçiç i dha mjekut Gjuro Macut për formimin e Qeverisë së re të Serbisë.
Kryeministri në detyrë, Milosh Vuçeviç, tha sot, se Gjuro Macut dhe Qeveria e re duhet të sjellin energji të re, raporton RFE.
Në një intervistë për televizionin publik serb, RTS, Vuçeviç tha se Macut është një person që mund të hapë dialogun shoqëror, sepse nuk është i ngarkuar me disa gjëra nga periudha e kaluar.
“Nuk e di nëse është e mundur të arrihet konsensus, por besoj se është e mundur të zhvillohet bisedë dhe dialog. Zgjidhja nuk qëndron te bllokadat dhe hedhja e vezëve,” tha Vuçeviç ndërkohë për mundësinë e dialogut ai tha se mbetet për tu parë.
“Besoj se dialogu është i mundur dhe jam i sigurt që është i domosdoshëm, por Serbia nuk ka shumë kohë për të pritur, duhet të ecë përpara.”
Ndryshe, Presidenti i Serbisë, Aleksandar Vuçiç, njoftoi dje se doktori i endokrinologjisë, Gjuro Macut, është mandatuar për formimin e Qeverisë së re të Serbisë.
Gjuro Macut është anëtar i Këshillit nismëtar për formimin e “Lëvizjes për popullin dhe shtetin” të Vuçiçit. Ndërsa iu drejtua kombit a tha se Qeveria e re do të zgjidhet deri më 18 prill dhe se Gjuro Macut do të ndihmojë shumë në qetësimin e tensioneve!
Sot, Kryetarja e Parlamentit të Serbisë, Ana Brnabiç, tha se Macut tregoi guxim të madh që pranoi të udhëheqë Qeverinë në një moment kaq sfidues. Kandidati për kryeministër, tha ajo e ka dëshmuar me jetën e tij se është dikush që mëson shpejt dhe është i gatshëm të punojë me përkushtim.
Ndërkohë, Kryetari i Partisë së Lirisë dhe Drejtësisë, SSP, Dragan Gjilas, vlerësoi se emërimi i një mjeku pa përvojë politike si mandatar, përfaqëson përpjekjen e Aleksandar Vuçiçit për të fituar kohë për të qëndruar në pushtet.
“Gjuro Macut ka nënshkruar më herët mbështetje për listën e Partisë Përparimtare Serbe dhe ka folur në mitingje partiake. Ai është edhe një tjetër zbatues i bindur i vullnetit të Vuçiçit.
Një Qeveri e tillë e Serbisë do të jetë edhe një formë tjetër e pushtetit absolut të Vuçiqit, e privuar nga legjitimiteti, kontrolli dhe përgjegjësia,” vlerësoi lideri i SSP-së.
Kryetari i Partisë së re Demokratike të Serbisë, NDSS, Milosh Jovanoviç, tha se emërimi i Gjuro Macut është ndërrim i ekuipazhit në Titanikun që drejtohet nga presidenti i Serbisë, Aleksandar Vuçiç.
“Është e qartë se një Qeveri e tillë nuk do të mund të shmangë përmbytjen, e aq më pak të zgjidhë krizën e thellë politike dhe shoqërore në të cilën ndodhet Serbia,” tha Jovanoviç.
Partia “Serbia Qendrore” vlerësoi se për qytetarët e Serbisë është plotësisht e parëndësishme nëse në krye të Qeverisë është mandatuar Gjuro Macut, kryeministri aktual Milosh Vuçeviç apo ish-kryeministrja Ana Brnabiç.
“Për të gjithë është e qartë se presidenti i Serbisë, Aleksandar Vuçiq, është drejtuesi i vërtetë,” thekson “Serbia Qendrore”.
Grupi joformal i intelektualëve “ProGlas” vlerësoi se emërimi i mandatarit dëshmon se Presidenti i Serbisë ka marrë vendim për një qeveri të vazhdimësisë.
Akademiku i Akademisë Serbe të Shkencave dhe Arteve, SANU, Vladimir Kostiç, sot në tryezën e “ProGlas” tha se muajt e fundit të gjitha grupet shoqërore janë mbledhur për të shprehur mospajtimin me gjendjen në Serbi.
“Sipas të dhënave të organizatës joqeveritare CRTA, vetëm javën e kaluar janë mbajtur 452 protesta dhe 128 tubime. Përkundër gjithë kësaj, presidenti ka vendosur të mos dëgjojë dhe të mos flasë për kërkesat e shumicës shoqërore, por ka marrë vendim për një qeveri të vazhdimësisë. Ne nuk e pranojmë këtë politikë të vazhdimësisë,” tha Vladimir Kostiç, raporton RFE.
Para këtij emërimi, Presidenti i Serbisë ka mbajtur konsultime me partitë parlamentare për të mandatuarin e Qeverisë së re, duke filluar nga data 2 prill.
Opozita parlamentare kishte paralajmëruar më parë se nuk do të marrë pjesë në ato konsultime. Ata kishin propozuar formimin e një qeverie kalimtare, gjë që është refuzuar nga përfaqësuesit e pushtetit.
Qeveria e Serbisë aktualisht ka mandat teknik, kur deputetët në Parlament konfirmuan dorëheqjen e Vuçeviçit nga posti i kryeministrit, çka shënoi fillimin e afatit prej 30 ditësh për formimin e qeverisë së re.
Vuçeviç dha dorëheqje një muaj e gjysmë më herët, pas sulmit të aktivistëve të Partisë Përparimtare Serbe ndaj një grupi studentësh që kishin bllokuar punën e Fakultetit në Novi Sad.
Rënia e Qeverisë së Serbisë që udhëhiqej nga Milosh Vuçeviç ndodhi në kulmin e protestave kundër regjimit, të cilat po i udhëheqin studentët që nga fundi i nëntorit 2024 kanë bllokuar dhjetëra fakultete në të gjithë Serbinë.
Në qendër të kërkesave të tyre të paraqitura ndaj institucioneve të Serbisë, raporton RFE, është përcaktimi i përgjegjësisë ligjore dhe politike për vdekjen e 16 personave nga shembja e strehës në Stacionin Hekurudhor të Novi Sadit, më 1 nëntor të vitit të kaluar.
