Vuçiç me këmbë në tokë: Futja e ushtrisë serbe në Kosovë, për NATO është akt armiqësor

“Nëse tentoni të futeni me ushtri ose policinë tuaj në Kosovë, NATO këtë veprim do ta trajtoj si akt armiqësor.” Kështu është shprehur Presidenti i Serbisë, Aleksandar Vuçiç duke u përgjigjur në pyetjen e gazetarit nëse shteti serb mund të fus një mijë pjesëtarë të forcave të sigurisë, siç e parashikon Rezoluta 1244  e KS të OKB.

Disa herë, tha Vuçiç e kam krahasuar situatën me rezolutën për Jerusalemin, ku fuqitë perëndimore e kanë hedhur poshtë presionin e Trumpit për zhvendosjen e ambasadave të tyre në këtë qytet, siç veproi Shtëpia e Bardhë.

“Atëherë ata janë arsyetuar me faktin se një veprim i tillë do të ishte në kundërshtim me rezolutën për Jerusalemin,”  u mundua të sqaroj Vuçiç pozicionin e tij përballë veprimeve të shtetit serb, kur kërcënohen serbët në Kosovë, duke shtuar se janë fuqitë perëndimore ato që lejojnë shkeljen e Rezolutës 1244 ndërsa liderët e tyre ndaj vërejtjeve të mia reagojnë vetëm duke i hedhur një sy këshilltarëve të tyre:

“Dhe… asgjë! Kjo është një situatë serioze, dhe dëshirojë ti sqarojë qytetarët se këtyre njerëzve nuk u intereson e drejta dhe Rezoluta 1244, por forca dhe gjendja faktike. Vlenë vetëm e drejta e forcës, dhe ne në përputhje me këtë duhet të bëjmë përpjekje që të ruajmë paqen dhe sigurinë dhe të ndërtojmë së bashku një jetë më të mirë dhe ekonomi më të fortë,” porositi Vuçiç duke folur për herë të parë me këmbë në tokë.