Vuçiç me senatorët amerikanë, Kosova dhe raportet me SHBA
Presidenti i Serbisë, Aleksandar Vuçiç, tha sot në Beograd se ka zhvilluar një bisedë të hapur me senatorët amerikanë Chris Murphy dhe Gary Peters.
Vuçiç gjithashtu theksoi se prioritet i Serbisë është formimi i Asociacionit të Komunave me shumicë serbe në Kosovë, raporton RFE, dhe se do të angazhohet për zbatimin e vendimit për formimin e tij siç është paraparë në Marrëveshjen e Brukselit.
Ai, përmes një postimi në Instagram, ka shkruar se para senatorëve ka ripërsëritur “vendosmërinë e Serbisë për të vazhduar zhvillimin e marrëdhënieve me SHBA-të në bazë të respektit dhe mirëkuptimit të ndërsjellë”, si dhe se në takim janë diskutuar edhe për çështje të tjera me interes për të dy vendet.
Kryeministrja serbe Ana Brnabiç ka anuluar takimin me senatorët amerikanë që ishte planifikuar për mëngjesin e 25 majit, njoftoi Qeveria e Serbisë.
Ministri serb i Mbrojtjes, Millosh Vuçeviç, u takua me senatorët dje në Beograd. Siç është raportuar, ata kanë biseduar për dialogun me Kosovën, politikën e jashtme dhe forcimin e partneritetit mes dy vendeve.
Senatorët amerikanë po vizitojnë Ballkanin Perëndimor dhe deri më tani kanë vizituar Prishtinën dhe Podgoricën.
Në Prishtinë ata janë takuar me Presidenten e Kosovës, Vjosa Osmani, dhe kryeministrin Albin Kurti. Pas takimeve me ta, senatorët janë shprehur se Serbia duhet t’i japë fund bllokadës në përpjekjet e anëtarësimit të Kosovës në organizatat ndërkombëtare, si dhe kanë nënvizuar rëndësinë e formimit të Asociacionit.
Kosova dhe Serbia kanë arritur dy marrëveshje për Asociacionin më 2013 dhe 2015.
Por, Marrëveshja mbi parimet për themelimin e Asociacionit, sipas Gjykatës Kushtetuese të Kosovës nuk është në harmoni të plotë me aktin më të lartë juridik të shtetit.
Megjithatë, Gjykata Kushtetuese është shprehur se ajo mund të harmonizohet me akte ligjore.
Serbia kërkon themelimin e Asociacionit, por Qeveria në Prishtinë ka shprehur frikën se një asociacion njëetik mund të prekë funksionalitetin e shtetit.
