Vuçiç: Naftën do ta marrim nga Lindja e Mesme, përmes Portit Durrësit
Duke paralajmëruar se sot Qeveria e Serbisë do të miratoj një përjashtim nga vendimi, në mënyrë që ti dërgohet Shqipërisë 31 mijë ton grurë dhe po aq misër, sipas kontratave të mëparshme, Aleksandar Vuçiç bëri të ditur se për shkak të problemeve rreth transportit të naftës përmes Detit të Zi dhe paqartësisë nëse Serbia do të përjashtohet nga sanksionet e BE ndaj kompanive ruse, po negocion me Lindjen e Mesme që naftën ta merr përmes Portit Durrësit.
“Jemi duke biseduar me miqtë tanë nga Lindja e Mesme që të importojmë naftë prej tyre dhe po shoh se nga ta sjellim. Më së miri dhe më së lehti na bie përmes Durrësit. Tani po shohim se si do ta organizojmë transportin nga Durrësi, a kemi autobote, në çfarë forme tjetër,” tha Aleksandar Vuçiç për RTV duke shtuar se Serbisë i duhet të importoj sasi të madhe të naftës në ditë.
Dhe, po ky Aleksandar Vuçiç sot në përvjetorin e bombardimeve të NATO-s inauguroi përmendoren e kriminelit të luftës, kolonelit të policisë serbe, Velko Radenoviç, i njohur ndër serb si Gjenerali.
Velko Radenoviç vdiq në vitin 2012, dhe DS, në atë kohë në pushtet, refuzoi ta varros me nderime shtetërore një kriminel lufte i cili sot u dekorua nga Aleksandar Vuçiç.
“Velko Radenoviç ka lindur në Gjakovë, është rritur në Pejë, ndërsa është shkolluar në Vushtrri. Me përfundimin e Shkollës së Mesme të MPB, u dërgua në Prizren, ku e kaloi pjesën më të madhe të jetës.
U bë i lavdishëm me çlirimin e Rahovecit më 1998 ku terroristët shqiptarë disa ditë i mbajtën banorët e Rahovecit si peng. Terroristët shqiptar kanë rrëmbyer më shumë se 100 civilë serbë, ndër të cilët gra dhe fëmijë. Shqiptarët i kanë keqtrajtuar në mënyrë shtazarake dhe i dogjën 42 njerëz. Radenoviç në atë kohë me pjesëtarët e njësisë speciale për dy ditë ngadhnjeu ndaj terroristëve. Me trimërinë e tij personalisht është veçuar në mbrojtjen dhe çlirimin e pengjeve nga terroistët,” thuhet në asryetimin e dekorimit të këtij krimineli të luftës në Kosovë, me të cilin sot mburret Aleksandar Vuçiç i cili me Edi Ramën do ta hap Ballkanin.
Ndryshe nga çfarë thotë propaganda e Vuçiçit, në fillim të korrikut të vitit 1998, kryetari i komunës kishte folur për të përditshmen serbe “Politika Ekspres” rreth pritjes së një “sulmi të madh terrorist” dhe u evakuuan gratë dhe fëmijët serbë.
Sulmi i cili kishte për qëllim t’i jepte UÇK-së përparësi të madhe strategjike duke formuar një korridor midis Drenicës (vatra e UÇK-së) dhe rajonit kufitar jugosllavo–shqiptar në jugperëndim, filloi më 17 korrik 1998 me sulmet mbi objektet strategjike të qytetit të Rahovecit, komisariatin e policisë, postën, spitalin dhe turizmin. Luftimet ishin më intensive më 18 korrik ku u vranë 8 luftëtarë të UÇK-së, 20 policë serbë të MUP-it dhe 5 civilë serbë. Beteja zgjati deri më 20 korrik, UÇK mbeti e pamposhtur dhe u largua drejt Malishevës.
