Vuçiç në Kosovë: Liqeni i Ujmanit, jetik për serbët dhe shqiptarët!

Presidenti i Serbisë, Aleksandar Vuçiç, ka nisur edhe zyrtarisht vizitën dyditore në veri të Kosovës. Pas orës 14:00, Vuçiç, i shoqëruar edh nga Drejtorii i Zyrës për Kosovën pranë Qeverisë së Serbisë, Marko Gjuriç, ka hyrë në Kosovë përmes pikës kufitare në Bërnjak që ndodhet në komunën veriore të Zubin Potokut. Aty ai është pritur nga përfaqësuesit politik të serbëve nga komunat veriore të cilët po e shoqërojnë gjatë vizitës.

Eskorta e Vuçiçit po sigurohet nga Policia e Kosovës.

Pas qëndrimit te Qendra Ekologjike Sportive në Zubin Potok, ndalesa kryesore e Vuçiçit ishte te Liqeni i Ujmanit apo siç njihet ndër serbë Liqeni i Gazivodës.

Aty Vuçiç tha se Ujmani është një liqe shumë me rëndësi si për serbët ashtu edhe për shqiptarët. Andaj, sipas tij, është me rëndësi që të gjendet zgjidhje e pranueshme për të dy palët.

“Mendoj se në Gazivodë shihet më së miri pesha e problemit me të cilin ballafaqohemi”, tha Vuçiç.

Ai tha se ka ardhur në Kosovë me idenë që të ruhet paqja, stabiliteti dhe t’i vazhdojë përpjekjet për gjetjen e një zgjidhje për problemet shekullore ndërmjet serbëve dhe shqiptarëve.

“Duhet ta ruajmë paqen dhe të shikojmë kah e ardhmja”, tha Vuçiç, duke nënvizuar se çështja e kufijve, e cila aktualisht po bëhet temë kryesore në bisedimet ndërmjet Kosovës dhe Serbisë, sipas tij, do të jetë më pak të rëndësishëm në Evropë.

Vuçiq ka komentuar edhe deklaratat e para pak ditëve të kancelares gjermane, Angela Merkel e cila tha se e respekton integritetin territorial dhe u shpreh kundër idesë së shfaqur nga Vuçiç dhe presidenti i Kosovës, Hashim Thaçi për korrigjim apo ndryshim të kufirit.

Ai tha se e kupton që kundërshtarët e tij i janë gëzuar kësaj deklarate. Kurse pranoi se fuqia e tij politike është minimale krahasuar me kancelaren Merkel, e cila përfaqëson ekonominë më të fuqishme evropiane.

“Unë nuk mund ta korrigjojë kancelaren Merkel, por kjo nuk do të thotë se nuk mund angazhohemi të ndihmojë popujt tanë. Kurse kur flasim për integritetin territorial, a po flasim për integritetin para vitit 2008 apo integritetin e vitit 2018”, tha Vuçiç.

“E di që ata që janë kundër meje gëzohen me deklaratat e saja, por nëse ajo thotë ne s’mund ta ndryshojmë atë çka thotë, kjo nuk do të thotë se nuk do të mund t’i ndihmojmë popullit tonë këtu. Jemi të vegjël andaj do të merremi me ekonominë dhe t’i ndihmojmë njerëzit tanë të jetojnë në këto vende”, tha presidenti serb Vuçiç.

“Jemi të vegjël, andaj do të merremi me ekonominë dhe t’i ndihmojmë njerëzit tanë këtu”, tha tutje Vuçiç.

Vizita e Vuçiçit ishte vënë në pikëpyetje për faktin se autoritetet e Kosovës, fillimisht i kishin lejuar atij vizitën në pjesën veriore, por jo edhe realizimin e agjendës për vizitë te Liqeni i Ujmanit.

Mirëpo, siç kanë deklaruar zyrtarët në Qeverinë e Kosovës, vizita te Liqeni i Ujmanit ishte lejuar pas trysnisë së Bashkimit Evropian, ngase të premten, Vuçiç në shenjë proteste, kishte refuzuar ta takonte presidentin e Kosovës, Hashim Thaçi në kuadër të dialogut politik ndërmjet Kosovës dhe Serbisë në Bruksel.

Liqeni i Ujmanit, nga Serbia dhe presidenti Vuçiç po cilësohen si burim dhe pasuri ekonomike serbe, çka kundërshtohet ashpër nga autoritetet në Prishtinë.

Të premten duke ju drejtuar opinionit në Serbi, Vuçiç tha se në përputhje me kërkesën e tij drejtuar EULEX-it, KFOR-it dhe autoriteteve të Prishtinës, ai do të shkojë në Kosovë dhe do ta fillojë vizitën pikërisht nga Ujmani.

“Pres që gjithçka të kalojë mirë dhe pres që atje, në mënyrën më normale t’iu drejtohem njerëzve dhe t’u tregoj njerëzve se sa është i rëndësishëm Liqeni i Ujmanit, jo vetëm për serbët në veri dhe në jug, por edhe për shqiptarët në Kosovë, si dhe sa është e rëndësishme që të investojmë shumë më tepër para”, tha Vuçiç.

Vizitën e tij, Vuçiç ka paralajmëruar se do ta vazhdojë gjatë ditës së shtunë në Zveçan, ndërkaq ditën e diel ai do të mbajë tubimin në Mitrovicë të Veriut.

Ai tha se do të vjen në Kosovë me plane ekonomike konkrete, por edhe për t’ua thënë të vërtetën serbëve të Kosovës.

“Të dielën në orën 12 është tubimi në Mitrovicë, në të cilin unë i ftoj të gjithë njerëzit, të cilët dëshirojnë të dëgjojnë edhe atë që ndoshta nuk do t’iu pëlqejë në tërësi, por do ta dëgjojnë të vërtetën”, Vuçiç.

Sipas tij, në disa ditët e fundit, situata ka qenë mjaft e tensionuar ndërmjet Prishtinës zyrtare dhe Beogradit zyrtar. Ai ka theksuar se gjatë kohës që do ta vizitojë Kosovën, pret që pala tjetër të japë porosi të arsyeshme, ndërkohë që edhe ai do të përpiqet që krejt çka do të flasë, të pranohet mirë me qëllim të ruajtjes së paqes, stabilitetit dhe përparimit në përmirësimin e marrëdhënieve ndërmjet serbëve dhe shqiptarëve.

“Për sa u përket shqiptarëve, Serbia dëshiron paqe, stabilitet, bashkëpunim dhe shpresoj që në vitet e ardhshme do të mund të vendosim edhe miqësinë me ta. Shpresoj, sepse gjithçka tjetër do të ishte katastrofale për të dy popujt”, theksoi Vuçiç.

Ai ka shprehur besimin që vizita e tij në Kosovë, do të kalojë pa probleme, sepse, siç ka thënë ai, nuk është as në interesin e shqiptarëve që të provojnë të bëjnë diçka të ngjashme që kanë bërë me shefin e Zyrës për Kosovën të Qeverisë së Serbisë, Marko Gjuriç. Ky i fundit, në mars të këtij viti, ishte arrestuar nga Policia e Kosovës, sepse kishte hyrë në territorin e Kosovës, siç ishte thënë, pa lejen e autoriteteve vendore dhe në mënyrë jolegale. Vuçiç ka shprehur bindjen se një gjë e tillë më nuk mund të ndodhë.

Mitrovica Veriore, një prej katër komunave me shumicë serbe në veri të Kosovës, tashmë është gati për të pritur presidentin serb. Rrugët dhe sheshet e atjeshme, janë përplot flamuj serb, fotografi të presidentit Vuçiç si dhe pankarta që i shprehin mirëseardhje atij.

Pjesa veriore e Kosovës e banuar nga shumica serbe, vazhdon të mbetet e ndikuar nga Beogradi, përkundër përpjekjeve disavjeçare të autoriteteve të Kosovës për integrimin e kësaj pjese.

Kjo vizitë e presidentit serb, po realizohet në kohën kur nga tavolina e bisedimeve ndërmjet Prishtinës dhe Beogradit në Bruksel janë lansuar ide për ndryshimin e kufijve./RFE/