Vuçiç NON GRATA/ Protesta acaron Edi Ramën, policët shkarkojnë gjithë mllefin e Kryeministrit mbi protestuesit

Filloi si protestë paqësore në orën 18:00 para bustit të vëllezërve Frashëri, madje u përsëritë disa herë nga drejtuesit e Qendrës së Lëvizjes Vetëvendosje, se kjo është një protestë paqësore kundër prezencës në Tiranë të Presidentit të Serbisë, Aleksandar Vuçiç, dhe Kryesuesit të radhës së Presidencës së Bosnje Hercegovinës, Milorad Dodik, të cilët për shqiptarët janë NON GRATA.

Në momentin kur gjithçka ishte në kontroll nga organizatori, dhe protesta vazhdoi drejtë Sheshit Nënë Tereza, për çfarë ishte marrë dhe leja, ia behu një mur i gjallë prej policëve të cilët ndonëse nuk e kishin përballë opozitën, e përdorën dhunën po me aq zell.

Për pak minuta dhuna policore përshkallëzoi deri në atë masë sa nuk u kursyen as gazetarët. Ata që ishin në trotuar u dhunuan që ishin në trotuar, ata që u spostuan për pak çaste në rrugë u dhunuan pse qëndrojnë në rrugë dhe u spostuan në trotuar.

Fundi është tashmë i qartë me Edi Ramën Kryeministër, të pabindurit u shoqëruan në polici ndonëse nga krerët e policisë u kërcënuan vetëm organizatorët.

Ndryshe, Presidenti i Serbisë, Aleksandar Vuçiç, dhe Kryesuesi i radhës i Presidencës së Bosnje Hercegovinës, Milorad Dodik, po qëndrojnë në Tiranë si pjesëmarrës në Samitin dyditor të radhës së Liderëve të Procesit Brdo-Brijuni.