Vuçiç nuk e di çfarë do BE, por pavarësinë e Kosovës tha se nuk do ta njohë!

Presidenti i Serbisë Aleksandar Vuçiç ka deklaruar se nuk e di se çfarë BE-ja dëshiron nga Serbia lidhur me çështjen e Kosovës dhe ka vlerësuar se me siguri as ajo vetë s’e di dhe ka përsëritur se as që bëhet fjalë që ta njohë pavarësinë e Kosovës.

Vuçiçi gjatë takimit me raportuesin e Parlamenti Evropian për Serbinë, David Mcallister e ka informuar për “gjërat jo shumë të mira që po ndodhin në Kosovë” dhe ka rinumëruar ditët qëkur s’është formuar Asociacioni i Komunave serbe sipas marrëveshjes së Brukselit.

“Sa i përket faktorit ndërkombëtar, kam thënë se nuk e kam asnjë ide se çfarë do ai nga Serbia, porse Serbia nuk do ta njohë pavarësinë e Kosovës ashtu si dëshiron ai, madje edhe nëse më godasin me shata në kokë“, tha Vuçiç.

“Mirë është të kemi paqe dhe njëfarë stabiliteti. E deri kur do të zgjasë ajo, askush s’e di. Ne duam ta mbrojmë paqen, por për tango duhen dy vet,” tha Vuçiç.

“Ne do të bëjmë çdo gjë që ta ruajmë paqen. I kam thënë Mcallisterit se nuk e di ç’ pritet nga Serbia. Kurrë nuk do ta njoh pavarësinë e Kosovës. Ne jemi të gatshëm të bisedojmë dhe gjithmonë dialogun duhet ta mendojmë si zgjidhje tjetër të problemit. Por kjo nuk varet vetëm nga Serbia,” tha Vuçiç.