Vuçiç nuk përjashton mundësinë e pranimit të shtetit të Kosovës
Presidenti i Serbisë, Aleksandar Vuçiç, nuk përjashton mundësinë e njohjes së pavarësisë së Kosovës, por theksoi se Beogradi duhet të marrë diçka në këmbim.
“Para së gjithash duhet të arrijmë kompromis. Nuk mund ta pranojmë Kosovën dhe të mos marrim asgjë nga pala tjetër,” tha Vuçiç për Agejncinë italiane të lajmeve ANSA në prag të vizitës së kryeministrit italian, Giuseppe Conte në Serbi.
Presidenti i Serbisë tha se çështja e ndryshimit të kufijve është kontraverse, pasi që jo të gjithë i pranojnë të njejtët kufijë, në varësi të asaj nëse e kanë pranuar pavarësinë ose jo.
“Për dallim nga liderët kosovarë të cilët çdo ditë i mashtrojnë qytetarët e tyre me premtime joreale se Prishtina do ti marrë të gjitha, dhe Beogradi asgjë, detyra ime është që ti sqaroj serbët për rëndësinë e kompromisit (me Prishtinën) që nuk paraqet humbjen por fitoren. Fitoren për të ardhmen e Serbisë,” tha Vuçiç, shkruan e përditshmja serbe “Danas” duke cituar intervistën në fjalë, ku Presidenti i Serbisë, ka mohuar se ka pas ndonjë takim sekret me Presidentin e Kosovës, Hashim Thaçi, siç theksojnë disa media, dhe ekzistimin e një drafti për marrëveshjen përfundimtare në mes të Beogradit dhe Prishtinës, që i ka përshkruar si “gënjeshtra të pastëra”.
Ai përsëriti se Beogradi nuk do ta vazhdoj dialogun me Prishtinën për derisa autoritetet kosovare nuk anulojnë taksën prej 100 për qind për importin e mallit nga Serbia dhe Bosnje Hercegovina.
“Nëse nuk arrihet një marrëveshje kompromisi për Kosovën, do të jetë katastrofë. Edhe pse gjithçka duket e vështirë dhe e pamundur, ne jemi të vendosur që të arrijmë kompromis, jam i sigurt që mund të arrijmë deri tek zgjidhja me ndihmën e miqëve tanë evropianë dhe me mbështetjen e Rusisë, Amerikës, Kinës dhe vendeve tjera,” tha Presidenti i Serbisë duke theksuar për një qasje të përgjegjshme të Beogradit ndërsa nuk u përgjigjë në masat “maksimaliste” dhe “provokative” të Prishtinës në mënyrë që të mos cenoj paqen dhe stabilitetin në rajon.
Vuçiç tha se vlerëson rolin ndërmjetësues të shefes së diplomacisë evropiane, Federica Mogherini, për dallim nga Prishtina që është kritike ndaj Brukselit. “Problemet janë në mes të serbëve dhe shqiptarëve, nuk mund ta kritikoj Evropën e cila ka bërë gjithçka që është e mundur për të ruajtur paqen,“tha Aleksandar Vuçiç për Agejncinë italiane të lajmeve ANSA, duke u shitur si njeriu më paqësor në botë edhe pse është ai i cili ka nxitur dhe vazhdon ta nxitë krimin serb ndaj institucioneve të Kosovës.
