Vuçiç paralajmëron vaksinë kundër COVID-19 deri në fund të vitit

Presidenti i Serbisë, Aleksandar Vuçiç, tha se vendi i tij po zhvillon bisedime me një vend, që, siç tha, e ka përfunduar vaksinën kundër COVID-19, dhe që “ua jep atë popullatave të rrezikuara”.

“Shpresojmë se para fundit të vitit mund ta kemi atë vaksinë. Do të ishte shpëtim për Serbinë dhe ekonominë tonë”, tha Vuçiç duke mos specifikuar se për cilin vend bëhet fjalë.

“Së shpejti do ta nënshkruajmë protokollin për bashkëpunim, por nuk mund t’ju them se cili vend është,” tha Vuçiç duke iu përgjigjur gazetarëve në Beograd ndërsa përfundoi:

“Do të shohim që Serbia të jetë ndër 30 vendet e para që do ta marrë atë vaksinë.”

Dhjetëra vaksina kundër COVID-19 janë në faza të ndryshme të testimit në gjithë botën.

Ndërkohë RFE raporton se kompania bioteknike amerikane “Moderna” tha se vaksina e saj eksperimentale kundër COVID-19, ishte e padëmshme dhe nxiti përgjigje imune te të 45 vullnetarët e shëndetshëm, që morën pjesë në një studim të fazës së hershme.

Qeveria e Shteteve të Bashkuara e mbështet vaksinën e “Moderna”, e cila së shpejti do të hyjë në fazën e fundit të testimit klinik.

“Moderna” tha se synon të regjistrojë rreth 30.000 njerëz për testimin e fazës së tretë që nis më 27 korrik.

Drejtori i Institutit Kombëtar të SHBA-së për Alergji dhe Sëmundje Infektive, Anthony Fauci, ka shprehur optimizëm të kujdesshëm se së paku një vaksinë do të mund të zhvillohet deri në fund të këtij viti apo në fillim të vitit 2021.