Vuçiç: Perëndimi u emocionua nga tanket dhe avionët serbë; Rama: Manovra teatrale luftarake!

“Shtatë ditë në Perëndim nuk u emocionuan, por u emocionuan kur Serbia tregoi se nuk do të lejoi dëbimin e popullsisë serbe,” tha Presidenti i Serbisë, Aleksandar Vuçiç pas fluturimit të tre helikopterëve mbi vendkalimin kufitar Jarinje si dhe dy avionëve rus duke shtuar se Perëndimi mendonte se po tallej dhe e kishte për konsum të brendshëm, por ai siguroi se e kishte me gjithë mend. Këtë “me gjithë mend”, Kryeministri Edi Rama sot pas takimit me Kryeministrin e Kosovës, Albin Kurti e quajti një manovër teatrale luftarake në kufi ndërsa i dha të drejtë Kosovës për reciprocitetin e targave si normë elementare.

“Serbia vetëm ka rritur nivelin e gatishmërisë së Ushtrisë, nuk është futur në territorin e Kosovës, jo pse e konsideron territorin e saj, por me Marrëveshjen e Kumanovës dhe të gjitha vendimeve që pasuan, përfundimisht me hapjen e vendkalimit administrativ, nuk ka të drejtë,” tha Vuçiç duke shtuar se i ka thënë Sekretarit të Përgjithshëm të NATO-s, Jens Stoltenberg, se forcat serbe nuk do të futen në Kosovë, sepse nuk duam ta kërcënojmë paqen dhe do të presim 24 orë që NATO të reagoj nëse vjen tek dëbimi i serbëve, tha Presidenti i Serbisë thuase po i flet fëmijëve në kopsht dhe jo opinionit publik i cili tashmë e ka të qartë se në krye të shtetit kriminal është po ai Vuçiç me kallashnikov në dorë nëpër Bosnje dhe Kroaci që u bë ministër i Informacionit të kriminelit Sllobodan Millosheviç në kohën e luftës me Kosovën.

Dhe, kur mëngjesi i së hënës lindi me tanket serbe në kufi me Kosovën dhe Kryeministri i Shqipërisë u gjend në Prishtinë në vizitë zyrtare, Edi Rama që kishte shumë plane me Vuçiçin “për të hapur Ballkanin” tha se është për të ardhur keq që në vend të përparimit konkret të dialogut drejt njohjes reciproke, sot jemi dëshmitarë të manovrave teatrale luftarake të Serbisë.

‘’Më vjen fort mirë të vizitoj Prishtinën menjëherë pas përfundimit të sesionit të 76-të të Asamblesë së OKB. Çështja e njohjes përfundimtare të Kosovës ishte një përparësite e vizitës në Nju Jork dhe mbetet e tillë.

Po ashtu një përparësitë e Shqipërisë si anëtare e Këshillit të Sigurimit të OKB do të jetë pikërisht nxitja e njohjes nga të gjithë e realitetit të pakthyeshëm të Kosovës. Nuk ka diskutim që në radhë të parë dhe mbi të gjitha është Serbia që duhet të njohë Kosovën, është për të ardhur keq që në vend të përparimit konkret të dialogut drejt njohjes reciproke, sot jemi dëshmitarë të manovrave teatrale luftarake të Serbisë.

Ato manovra nuk mbrojnë qytetarët serbë në veri të Kosovës, sikundër pretendohet nga udhëheqja e Beogradit dhe nga disa fantazma të ushtrisë së mundur 20 vite më parë, sikur kanë dalë nga varri me pretendimin se po mbrohet integriteti dhe siguria e qytetarëve serbë në Kosovë. Qytetarët serbë në Kosovë jetojnë të pakërcënuar, madje fjala vjen ju paguhen dhe faturat e energjisë elektrike nga qeveria këtu si askujt askund në botë. Fatkeqësisht ato manovra sjellin në skenë hijen e së shkuarës, nxisin nacionalizmin vandal të institucioneve publike. Qytetarët serbë nuk janë viktima të represioni, por janë pengje të staniacionit në dialog,” tha Kryeministri Rama duke përfunduar:

“Aplikimi i reciprocitetit të targave është normë elementare, por dhe marrëveshje e arritur me kohë mes dy qeverive respective. Dua ta them këtu sot, qëndrimin e Shqipërisë të cilin e gjykoj të qartë e të drejtë, qysh nga çasti i parë që u shfaq, e drejta këtu është më Kosovën dhe pikë.”

Ndërkohë Kryeministri i Kosovës, Albin Kurti, edhe me këtë rast u shpreh se forcat speciale nuk ndodhen në kufi për të ndërmarrë sulme, por vetëm për të mbrojtur policinë kufitare dhe godinat atje.

“Detyra e forcave është të mbrojnë detyrën kufitare dhe policët kufitarë. Po të mos ishte njësia speciale e Kosovës, policët dhe godinat aty do të ishin në rrezik. Buldozerët nuk janë për të penguar rrugë, por për të sulmuar nëse do të jetë nevoja.
Në asnjë pikë kufitare s’ka pasur incident. Ku ka polici të Kosovës nuk ka dhunë, incidente. Policia e Kosovës është tejet profesionale dhe korrekte dhe unë i falenderoj për punën dhe angazhimin që kanë bërë. Ne kemi bërë një ofertë që kemi thënë që sia vlen të kemi targa të përkohshme si Republika e Kosovës dhe e Serbisë. Mirëpo ne kemi thënë që të heqim targat e përkohshme dhe lëvizja të jetë sa më e kollajshme dhe pa vonesë,” tha Kurti duke përfunduar:

“Njësitë speciale nuk ndodhen për të demonstruar forcë, por për të mbrojtur policët kufitarë dhe pikat kufitare. Unë asnjëherë gjatë këtyre ditëve nuk jam shfaqur me ministrinë e Mbrojtjes, vetëm me ato të Brendshëm. Ndërsa Serbia shkon në kufi me ministrin e saj të Mbrojtjes. Ata që kanë bllokuar rrugët kanë bllokuar veten, qytetarët serbë. Ne jemi këtu për t’ju shërbyer të gjithëve.”

Në fund, do të hapet ose jo Ballkani, tahsmë është e qartë se nuk varet as nga Edi Rama e aq më pak Zoran Zaev, por nga njeriu i cili po mendohet nëse do të bëjë luftë me gjithë botë si paraardhësi i tij Sllobodan Millosheviç, ose do të pranoj realitetin, COVID-19 i ka dalë nga kontrolli; Arsye kjo që e bëri gjithë këtë katrahurrë me helikopterë dhe avionë rus!