Vuçiç: Pozicioni i Serbisë nuk ka qenë kurrë më i rëndë
Presidenti i Serbisë, Aleksandar Vuçiç, tha se pozicioni politik i Serbisë nuk ka qenë kurrë më i rëndë dhe se është komplikuar edhe më shumë nga deklaratat e presidentit rus, Vladimir Putin.
Ai nuk e specifikoi se cilave deklarata të Putinit iu referohet, raporton RFE.
Pas një takimi me ministren e Jashtme të Gjermanisë, Annalena Baerbock, sot në Berlin, Vuçiç tha se situata në të cilën ndodhet Serbia, marrë parasysh krizën në Ukrainë, është pothuajse e pamundur.
“Në ditën e tretë të sulmit në Ukrainë, ne e kemi bërë të ditur pozicionin tonë strategjik. Serbia është në të njëjtin pozicion edhe në ditën e 71-të,” tha Vuçiç para gazetarëve.
Serbia është vendi i vetëm në Ballkanin Perëndimor që nuk ka ndërmarrë sanksione kundër Rusisë, për shkak të pushtimit të Ukrainës.
Nga blloku evropian i kanë bërë disa herë thirrje që të harmonizojë politikën e saj të sanksioneve me atë të BE-së.
Vuçiç dhe kryeministri i Kosovës, Albin Kurti, janë pritur dje në takime të ndara nga kancelari gjerman, Olaf Scholz.
Ky i fundit tha se njohja e Kosovës nga Serbia duhet të jetë pjesë e dialogut që zhvillojnë dy vendet për normalizimin e marrëdhënieve.
Scholz, po ashtu, tha se përparimi në dialog është kyç për avancimin e Kosovës dhe Serbisë drejt integrimit evropian.
Vuçiç përsëriti sot se Serbia është në rrugën evropiane, se nuk do të kthehet diku tjetër dhe se do të mbetet ushtarakisht neutrale.
Bisedimet që ka pasur me zyrtarët gjermanë, tha Vuçiç, nuk kanë qenë të lehta.
“Gjermania është shteti më i fuqishëm evropian në çdo kuptim. Ne nuk mund të zgjedhim dhe ta ndryshojmë qëndrimin e saj për çështjen e Kosovës, sepse kjo nuk do të ndodhë,” tha Vuçiç.
Ai, raporton RFE, po ashtu, tha se biseda me kryeministrin e Kosovës, Albin Kurti, në Berlin ka qenë “shumë e vështirë”, por nuk dha detaje.
Ndryshe, Kurti dhe Vuçiç u pritën bashkë në një darkë joformale në Berlin, nën ndërmjetësimin e të dërguarit të Bashkimit Evropian për dialogun Kosovë-Serbi, Mirosllav Lajçak.
