Vuçiç: Të shqetësuar nga presioni i Gjermanisë për Kosovën!

Presidenti i Serbisë, Aleksandar Vuçiç, është shprehur se mosmarrëveshja e vetme midis Serbisë dhe Gjermanisë ka të bëjë me Kosovën. Ai tha se nuk shqetësohet për deklaratat e kryeministrit të Kosovës, Albin Kurti, por për presionin që do mund t’i vendoset Serbisë nga fuqitë perëndimore.

Duke folur për TV Happy, presidenti serb tha se Gjermania ka politikën e saj dhe kujtoi se janë kundër ndryshimit të kufijve.

“Ata nuk i lënë aleatët e tyre, kështu që ata ishin të parët që ndihmuan kroatët në vitet 1990, serbët nuk ishin aleatët e tyre. Ne duhet ta ndryshojmë këtë dhe të bëhemi aleatë. Nuk do të jetë e lehtë. Por ne duhet të bëhemi aleatë si të amerikanëve ashtu edhe të gjermanëve,” tha Vuçiç duke shtuar se ka vetëm fjalë të mira për kancelaren gjermane, Angela Merkel.

Kulmi i presionit mbi Serbinë pritet në tetor dhe nëntor kur të mbahen edhe zgjedhjet në Gjermani, tha Presidenti i Serbisë, Aleksandar Vuçiç,.

Duke folur për “non-paper”-at, ai tha se Kosova është e pavarur në secilën prej tyre. I pyetur nëse është e mundur të bisedohet me kryeministrin dhe presidenten e Kosovës, Albin Kurti dhe Vjosa Osmani, Vuçiç tha se me të gjithë mund të bisedohet, por është çështje tjetër nëse do të arrihet diçka.

Duke komentuar dialogun e ardhshëm dhe faktin që Albin Kurti tha se nuk është prioritet për të, Vuçiç u shpreh se Kurti do të ulet në tryezë dhe do ta bëjë punën e tij.

“Kurti nuk është as Hegel, as Ajnshtajn, as Spinoza apo Leibniz për ta komentuar aq shumë. Ai do të vijë ta bëjë punën e tij, për të thënë se serbët janë kriminelë, horra, se ai dëshiron njohjen. Unë do të vij të them se çfarë është politika jonë dhe kaq.”