Vuçiç: Zyrtarët shqiptarë nga Kosova nuk duan të bisedojnë për çështjet e rëndësishme!

Presidenti i Serbisë, Aleksandar Vuçiç duke vëzhguar zhvillimet në politikën kosovare dhe kohë pas kohe edhe duke ndërhyrë përmes Listës Srpska, theksoi në prag të takimit të Brukselit më 7 shtator, se përfaqësuesit e Kosovës nuk dëshirojnë të bisedojnë për çështjet thelbësore.

“E shoh që zyrtarët shqiptarë nga Kosova nuk dëshirojnë të bisedojnë as për Asociacionin e komunave me shumicë serbe, as për veriun, as për Gazivodën. Siç duket nuk dëshirojnë të bisedojnë për asgjë të rëndësishme,” tha Aleksandar Vuçiç duke u përgjigjur në pyetjen e Agjencisë serbe të lajmeve Tanjug, se si i shikon deklaratat e fundit të Hashim Thaçit dhe Ramush Haradinajt, se cilat çështjet për ta nuk janë temë e bisedimeve.

“Serbia nuk ka kohë për të humbur dhe nuk dëshiron të bisedoj për të gjitha çështjet që janë me rëndësi për serbët dhe shqiptarët,” tha presidenti i Serbisë duke shtuar se është koha që Beogradi dhe Prishtina të marrin përgjegjësitë.

“Koha është që ne të vendosim për të ardhmen tonë, e jo që dikush të vendos nga jashtë,” tha Vuçiç duke theksuar se politikanët janë zgjedhur jo për t’ju servilosur votuesëve por për të zgjedhur çështjet më të rëndësishme të qytetarëve.

Reagimi i presidentit të Serbisë, Aleksandar Vuçiç vjen pas deklaratave konfuze të Presidentit të Kosovës, Hashim Thaçi që bijnë në kundërshtim me ato të kryeministrit Ramush Haradinaj, edhe pse kanë mbetur vetëm edhe dy ditë deri tek takimi I Brukselit të dy presidentëve me ndërmjetësimin e Përfaqësueses së Lartë për Politikë të Jashtëm dhe Siguri pranë BE, Federica Mogherini.