“West Point”, kadetja kosovare emërohet në zinxhirin komandues

Duke u bazuar në rezultatet e shkëlqyera gjatë studimeve në Akademinë Ushtarake Amerikane “West Point’’ në New York, kadetja e Forcës së Sigurisë të Kosovës, Arelena Shala, është emëruar rreshtermajor i Komandës së Regjimentit në zinxhirin komandues të kadetëve të Akademisë Ushtarake, si e vetmja kadete ndërkombëtare, në mesin e 4400 kadetëve sa ka akademia më elitare amerikane.

Forca e Sigusrisë së Kosovës bënë të ditur se kadetët nga Kosova, Arelena Shala dhe Ylli Dalladaku, janë dy kadetë të cilët kanë filluar studimet në këtë akademi në vitin shkollor 2016/2017.  Certifikatën e pranimit në këtë akademi, asokohe  ua pat dhënë solemnisht ambasadori amerikan në Kosovë.

Ndryshe, Akademia Ushtarake e SHBA në West Point është një kolegj katërvjeçar, bashkë-edukues, federativ, liberal i arteve, i vendosur 50 milje në veri të New Yorkut. Kjo akademi u themelua që në vitin 1802, si kolegji i parë i inxhinierisë në Amerikë, i cili edhe sot vazhdon të jetë institucioni kryesor i zhvillimit udhëheqës në botë, i radhitur vazhdimisht në mesin e kolegjeve më të mira në vend.

Misioni i Akademisë Ushtarake Amerikane “West Point’’ vazhdon të mbetet edukimi, stërvitja dhe frymëzimi i korpusit të kadetëve, në mënyrë që çdo i diplomuar të jetë një drejtues i përkushtuar ndaj Detyrës, Nderit dhe Vendit, si dhe i përgatitur për një karrierë të përsosmërisë profesionale dhe shërbimit ndaj kombit.