Xhaferi: Shkupi nuk po e neglizhon bashkëpunimin me Beogradin

Në Beograd kam ardhë me mesazhin për dialog dhe bashkëpunim. Kështu u shpreh Kryetari i Parlamentit të Maqedonisë, Talat Xhaferi me rastin e vizitës në Serbi duke shtuar se këtu ka një përshtypje të gabuar se Shkupi po neglizhon bashkëpunimin me Serbinë.

Xhaferi kujtoi, duke folur për Agjencinë e lajmeve Tanjug,  se Maqedonia dhe Serbia në procesin e Berlinit ranë dakord të zgjidhin problemet e mundshme dhe mosmarrëveshjet me dialogun ndërsa vlerësoi se marrëdhëniet mes këtyre dy vendeve janë korrekte, miqësore, por që ka hapësirë për thellimin dhe zgjerimin e bashkëpunimit në të gjitha fushat.

Në konstatimin se perceptohet se qeveria e re në Shkup nuk është më pozitivja në raport me Beogradin, Xhaferi tha se autoritetet e Maqedonisë, në politikën e jashtme, dhanë një kontribut të madh në procesin e integrimit evropian, veçanërisht në raport me Bullgarinë dhe Greqinë, dy vende me të cilat deri më tani Shkupi ka pasur probleme në rrugën e tij evropiane.

“Për këtë mund të krijohet përshtypja se ne po e shpërfillim bashkëpunimin me Serbinë”, tha Kryetari i Parlamentit të Maqedonisë, Talat Xhaferi.