Xhamajka përgënjeshtron Thaçin, s’e kemi njohur pavarësinë e Kosovës!

Ministrja e Jashtme e Xhamajkës, Kamina J. Smith, ka përgënjeshtruar Presidentin Hashim Thaçi duke saktësuar se vendi i saj nuk e ka njohur pavarësinë e Kosovës.

Në një postim në Twitter, Smith shpërndau një deklaratë të presidentit të Kosovës, Hashim Thaçi, i cili e falënderoi Xhamajkën për njohje, por ajo tha se vendi i saj nuk e ka ndërmarrë një hap të tillë.

“Deri më sot, Xhamajka nuk e ka njohur Kosovën,” thekson Smith.

Ndryshe, RFE raporton, se dje Thaçi tha se deri te njohja nga Xhamajka ka ardhur pas një lobimi shumëvjeçar.

“Sapo u njoftova nga ambasadorja jonë (në SHBA) Vlora Çitaku se Xhamajka e ka njohur Kosovën si shtet të pavarur dhe sovran,” bëri të ditur Hashim Thaçi përmes rrjetit social Twitter.

Pavarësinë e Kosovës, sipas të dhënave të publikuara në web-faqen e Ministrisë së Punëve të Jashtme të Kosovës, nuk e ka njohur asnjë shtet që nga viti 2018.