Xhisiela bashkon gratë shqiptare, të hënën në 17:30 protestë para Kryeministrisë

Përfaqësueset e forumeve për mbrojtjen e të drejtave të grave, deputetet e opozitës, gra e vajza të mbledhura bashke kanë bërë sot thirrje para kryeministrisë, për të gjitha gratë dhe nënat, burrat dhe baballarët, të bashkohen në protestën e së hënës në mbrojtje të Xhisielës dhe kundër shtetit që hesht dhe mbron përdhunuesit.

Thirjen e kanë nisur vajzat e reja dhe studentet e shqetësuara për situatën e rendit dhe të sigurisë në vend. Thirrje për mbrojtjen e Xhisieles dhe të çdo femre në vend përballë pasigurisë dhe heshtjes së shtetit, përballë njerëzve me pushtet që dhunojnë.

“Bashkohuni, ngrini zërin në mbrojtje të Xhisielës. Le të mblidhemi bashkë në protestën e shoqërisë civile të hënën në orën 17:30,” ­ bënë thirrje deputetet e PD-­së.

Deputetja e Partisë Demokratike  dhe kryetarja e Lidhjes Demokratike të Gruas së Shqipërisë,  Albana Vokshi, tha se dhuna shtetërore ka një përgjegjës, dhe sipas saj është kupola drejtuese. Heshtja shtetërore sipas saj, tregon qartë se në vend që të mbrojë një të dhunuar, politika ka zgjedhur rrugën e kundërt. “Këtu jemi për të shprehur indinjatën ndaj heshtjes së ministrit, kryeministrit. Sot të gjithë ne ndihemi pak të dhunuar. Xhisiela është djegur dhe goditur në formë shtazore, goditur me qytën e një arme. Shteti u bë palë me dhunuesin dhe përdhunuesin. Sot kemi djalin e një deputeti, i cili është dhunuesi dhe përdhunuesi. Sot kemi një deputet, i cili e ka kërcënuar me jetë një oficer policie. Sot krimi po troket në çdo derë. Për të gjitha forumet politike të grave, unë kam sot një apel për çdo prind që ka një vajzë, për çdo nënë që ka një fëmijë. Të bashkohemi kundër kësaj dhune shtetërore”, tha Albana Vokshi

Ndërsa deputetja e PD dhe Sekretarja e Aleancës së Grave, Dhurata Çupi,  i bëri thirrje edhe kolegeve të mazhorancës:

“Thërritini ndjenjës njerëzore të mëmësisë dhe denonconi ngjarjen e paprecedentë. Kërkojmë që kryetari i Kuvendit, presidenti, kryeministri, ministri i Brendshëm, prokuroria dhe të gjitha institucionet të prononcohen, jo vetëm të distancohen por të dënojnë me forcë këtë ngjarje. Ndaj djalit të deputetit, që është denoncuar për dhunën nuk është marrë asnjë masë, kemi mosreagim nga Ministria e Brendshme dhe kreu i policisë së Shtetit. Ndaj vajzës nuk është marrë asnjë masë mbrojtjeje. Duam të informohemi për çdo masë që do të merret për jetën dhe sigurinë për Xhisielën”­tha ajo