“Xibraka”, Olsi Rama e kallëzoi, Gazment Bardhi thirret në SPAK: Kishte vetëm një pyetje…

Pas depozitimit të kallëzimit në SPAK të vëllaut të Kryeministrit Edi Rama, Olsi Rama, ndaj Gazment Bardhit, Kryetari i grupit Parlamentar të Partisë Demokratike u thirr në Prokurorinë e Posaçme, ku siç tha seanca ishte vetëm me një pyetje ndërsa bëri të ditur se dosja “Xibraka” është rihapur.

“Gjithçka që ka denoncuar publikisht e ka dorëzuar në SPAK. Jam informuar me shkrim nga drejtuesi i SPAK dhe hetuesit e BKH se dosja e Xibrakës është rihapur, ka rinisur hetimi për identifikimin e personave të përfshirë.
Seanca e marrjes në pyetje kishte vetëm një pyetje, u thirra si person në dijeni dhe u pyeta nëse kisha diçka për të shtuar. Kësaj çështje nuk i ikën as me letra bakalli, as me çështje dite,” tha Gazment Bardhi duke bërë të ditur se merr me dhjetëra ankesa e shqetësime edhe nga qytetarët.

“Për sa kohë jam drejtuar prokurorisë së Posaçme, e vetmja gjë që bëj është nxitja për të vepruar në përputhje me ligjin. Kam pasur një pretendim ligjor pa asnjë diskutim dhe këtë gjë e kam trajtuar në rrugë institucionale. Jam përpjekur gjithmonë si funksionar publik i përgjegjshëm, që sa herë ka diçka për një institucion, i drejtohet atij institucioni,” tha Gazment Bardhi pas marrjes në pyetje nga BKH ndërsa pret të hetohet edhe roli i dy prokurorëve në dosjen Xibraka.

“Këtë çështje e kam trajtuar në rrugë institucionale. Nuk kam bërë politikë me këtë çështje. Presim që prokuroria e Posaçme të zbatojë ligjin.

Të hetohet dhe roli i dy prokurorëve që kanë pasur në dorë dosjen Xibraka. Kokat e grupit kriminal ndoshta kanë ngelur pa identifikuar. Bëhet fjalë për laboratorin e parë të kokainës në vendin tonë, duhet të kishte hetim serioz. Të dy prokurorët zgjodhën që të bënin punën Ramës, se kishin interes vettingun.”