Yoshihide Suga zgjidhet kryeministër i ri i Japonisë

Yoshihide Suga u zgjodh kryeministër i ri i Japonisë dhe gjatë ditës pritet ta bëjë publike përbërjen e qeverisë së re. Ai do të pasojë Shinzo Aben, i cili njoftoi dorëheqjen muajin e kaluar për arsye shëndetësore.

Suga, 71 vjeçar, mori 314 nga 462 vota në dhomën e ulët të parlamentit. Një shumicë e thjeshtë ishte e nevojshme për zgjedhjen e kryeministrit të ri.

Të hënën, Yoshihide Suga u zgjodh kreu i ri i partisë në pushtet.

Kështu, ish-kryesekretari i kabinetit të Abes siguroi zgjedhjen si kryeministër në parlament, ku koalicioni qeverisës i Liberal Demokratëve ka shumicën.

Suga fitoi mbështetjen e njerëzve kryesorë në parti për shkak të pritjes që kanë ata se ai do të vazhdojë politikën e Abes.

Kryeministri i ri njoftoi se përparësitë kryesore të qeverisë do të jenë lufta kundër koronavirusit dhe rimëkëmbja e ekonomisë e goditur rëndë nga pandemia.

Abe, që ka thyer rekord si kryeministri i cili ka shërbyer më së gjati në Japoni, raporton RFE, para se të largohej nga zyra, nuk ka përkrahur publikisht asnjë kandidat që ka garuar për shef të ekzekutivit.