Yuri Kim e quan Alibeajn “U.D. Kryetar i PD”, reagon PD: Shkelmoi vendimin e gjykatës!
Pas njoftimit të Ambasadores së SHBA se kishte takuar “Ushtruesin e Detyrës së Kryetarit të PD, Enkelejd Alibeaj” ka reaguar Partia Demokratike duke theksuar se Yuri Kim vërtetoi sot atë që e ka parathënë edhe me veprime të tjera, se është në shërbim të lojërave të Edi Ramës për të dobësuar dhe për të mbajtur sa më gjatë peng opozitën, duke komanduar për kryetar ata që u refuzuan me votë masive nga demokratët.
“Yuri Kim hyri sot në Kuvendin e Shqipërisë për një takim me kreun e grupit parlamentar të PD Enkelejd Alibeaj, por kur doli, me anë të një deklarate e shpalli atë në mënyrë qesharake dhe absurde si kryetar të Partisë Demokratike,” theson PD duke shtuar se Yuri Kim sot, sikurse dhe herë të tjera, nuk bëri asgjë më pak përveçse shkeli në mënyrë të përsëritur Konventën e Vjenës si diplomate, duke shkelmuar mbi vendimin e gjykatës që konfirmoi verdiktin e demokratëve në Kuvendin e 11 dhjetorit, që i riktheu selinë, logon dhe vulën Komisionit të Rithemelimit – organit kolegjial të vetëm udhëheqës aktual të Partisë Demokratike.
Ndryshe, sot Ambasadorja e SHBA në Tiranë, Yuri Kim, sot pas takimit që zhvilloi me Kryetarin e Grupit Parlamentar të PD, Enkelejd Alibeaj e bëri të qartë se ka takuar “Ushtruesin e Detyrës së Kryetarit të PD” duke mos pranuar Vendimin e Gjykatës që njeh ndryshimet e Statutit të PD më 11 Dhjetor dhe Komisionin e Rithemelimit si drejtues i kësaj partie deri në zgjedhjet e radhës në PD.
Deklaratë:
Pas një heshtje të zgjatur e të kuptueshme nga zgjedhjet e 6 Marsit, ambasadorja Yuri Kim injoroi themelin e demokracisë së shtetit të saj “We, the People”.
Yuri Kim hyri sot në Kuvendin e Shqipërisë për një takim me kreun e grupit parlamentar të PD Enkelejd Alibeaj, por kur doli, me anë të një deklarate e shpalli atë në mënyrë qesharake dhe absurde si kryetar të Partisë Demokratike.
Yuri Kim sot, sikurse dhe herë të tjera, nuk bëri asgjë më pak përveçse shkeli në mënyrë të përsëritur Konventën e Vjenës si diplomate, duke shkelmuar mbi vendimin e gjykatës që konfirmoi verdiktin e demokratëve në Kuvendin e 11 dhjetorit, që i riktheu selinë, logon dhe vulën Komisionit të Rithemelimit- organit kolegjial të vetëm udhëheqës aktual të Partisë Demokratike. Ajo gjithashtu, injoroi edhe votën e zgjedhësve të shprehur qartë më 6 mars.
Yuri Kim vërtetoi sot atë që e ka parathënë edhe me veprime të tjera se është në shërbim të lojërave të Edi Ramës për të dobësuar dhe për të mbajtur sa më gjatë peng opozitën, duke komanduar për kryetar ata që u refuzuan me votë masive nga demokratët.
Për fat te mirë, shqiptaret e kanë kuptuar se vlerat e vërteta të SHBA nuk janë arroganca, diversioni apo diktati, por vota e lirë dhe demokracia. Këtë e kuptoi edhe ish kryetari që u largua dhe do ta kuptojë cilido që mendon të uzurpojë opozitën kundër vullnetit të shumicës.
