Zbardhen të dhënat nga PEI, KQZ: Më 25 prill, 13 qytetarë votuan 34 herë në Shkodër

Pas kërkesës së KAS, administrata e KQZ ka zbardhur përmes kryqëzimit të të dhënave nga pajisja e identifikimit elektronik, PEI, se në zgjedhjet e 25 Prillit, në Qarkun Shkodër, 13 qytetarë dyshohet se kanë votuar 34 herë në Qendra te ndryshme Votimi.

Kështu, bazuar në të dhënat e detajuara që ofrohen në tabelë, një person ka votuar 7 herë.

Të dhënat e kryqëzuara u ofrohen anëtarëve të Komisionit të Ankimimeve dhe Sanksioneve, KAS, pasi në mbledhjen e ditës së hënë, dy anëtarët e KAS, Ledio Braho dhe Elvis Çefa kërkuan këtë informacion.

Për Qarkun Shkodër, PD ka kërkuar nga KAS shpalljen e pavlefshme të zgjedhjeve dhe përsëritjen e tyre, pasi sipas kësaj force poltike, ka dyshime të arsyeshme për shkelje të ligjit. Ankimimi për Shkodrën do vijojë shqyrtimin sot pas ankimimit të Tiranës.