Zbardhet dokumenti/ Negociatat për Shqipërinë dhe Maqedoninë të hapen në 2019-ën

Një dokument po qarkullon në Bruksel lidhur me negociatat mes BE-së dhe Shqipërisë dhe Maqedonisë. Vendimi për hapjen ose jo të negociatave do të jepet në fund të qershorit, por disa nga shtetet anëtare të BE-së mendojnë hapja e negociatave mund të ndodhë vetëm pranverën e vitit të ardhshëm. Dokumenti është botuar nga Makfax, ndërsa ai i përket shteteve që konsiderohen skeptike.

Korrupsioni dhe lufta ndaj krimit të organizuar duket se janë pengesat kryesore për të dy vendet e Ballkanit Perëndimor, ndërsa thuhet se reforma në drejtësi është në fillimet e saj.

Sipas dokumentit, reforma në drejtësi ka nevojë për përparim afatgjatë dhe një ndryshim të vazhdueshëm në sjellje.

Lufta kundër korrupsionit dhe krimit të organizuar ende nuk ka dhënë rezultate të kënaqshme, pavarësisht kornizës së përcaktuar ligjore dhe institucionale, korrupsioni është i përhapur në shumë fusha dhe vazhdon të jetë një problem serioz, ndërsa kapaciteti institucional për t’u marrë në mënyrë efektive me korrupsionin kanë treguar mangësi strukturore dhe operative, ndër të cilat është ndërhyrja politike. Gjithashtu evindetohet trafiku i drogës dhe kultivimi i kanabisit, si të tjera probleme në raport me krimin e organizuar.

“Që nga viti 2014 Shqipërisë i janë kërkuar reforma, por është bërë shumë pak. Vettingu sapo ka nisur dhe ende nuk ka dhënë rezultate. Korrupsioni është një problem i madh për Shqipërinë. Sidomos në radhët e policisë është problem shqetësues. E lartë është edhe ndërhyrja politike.

Goditja kundër krimit të organizuar është shumë e dobët dhe asnjë prej zyrtarëve të lartë nuk është vënë para përgjegjësisë për akuzat e bëra”, thuhet në dokumentin e publikuar.

Sipas këtij dokumenti, Shqipëria në tërësi nuk i ka plotësuar kushtet, kështu që dhe hapja e negociatave është e parakohshme.

Ata argumentojnë se Bashkimi duhet të bëhet më i fortë para se të bëhet më i madh.

“Siç konfirmon Këshilli çdo vit në konkluzionet e tij mbi zgjerimin: kapaciteti i BE-së për të integruar anëtarët e rinj në të gjitha dimensionet e saj duhet të merret parasysh para se të marrë ndonjë vendim lidhur me zgjerimin. Në Strategjinë e botuar më 6 shkurt, Komisioni vetë ka shkruar se Bashkimi ynë duhet të jetë “më i fortë dhe më i rreptë para se të bëhet më i madh”.

“Para zgjedhjeve të ardhshme evropiane, duhet të mendojmë për një agjendë strategjike për periudhën e re që do të fillojë në pranverën e vitit 2019 dhe ta bëjë më të qartë atë që dëshirojnë 27 shtetet anëtare për BE-në e re. Në këtë kontekst, ne besojmë se kushtet për hapjen e negociatave të pranimit me Shqipërinë dhe Maqedonisë nuk përmbushen. Ne riafirmojmë angazhimin tonë ndaj perspektivës evropiane të këtyre dy vendeve dhe gjithë Ballkanit Perëndimor, dhe ne mbështesim fuqishëm angazhimin e rëndësishëm të BE-së në këtë rajon. Ne duhet t’i drejtojmë përpjekjet tona këtu për të ndihmuar këto vende të jenë vërtet të përgatitura kur të plotësohen të gjitha kushtet “, thonë ata.

Han në një intervistë me gazetën gjermane Welt njoftoi se Maqedonia dhe Shqipëria do të marrin rekomandime në qershor për fillimin e negociatave për anëtarësim në BE.