Zbardhet skenari/ Veliaj si Rama në 2003-in, ja pse shkoi sot në Kuvend…

Kryebashkiaku i Tiranës, Erjon Veliaj, ka dhuruar pothuajse të njëjtat skena si Edi Rama në vitin 2003 kur u thirr në komisionin hetimor parlamentar për të dëshmuar mbi mënyrën e drejtimit të Bashkisë. Rama dikur bënte zhurmuesin në komisionin që drejtohej nga deputeti i ndjerë Sokol Olldashi, dha një shoë dhe kurrë nuk iu përgjigj pyetjeve të komisionit të ngritur enkas për të.

Sot Erjon Veliaj, në krah të ministres së Kulturës, Mirela Kumbaro, u shfaq në komision, pa e thirrur askush, dhe për mbi 1 orë krijoi tensione, përplasje, shoë, ndërsa në fund u largua, duke marrë me vete edhe ministren edhe deputetët socialistë.

Mbledhja e sotme e komisionit ishte një seancë dëgjimore me ministren Kumbaro lidhur me çështjen e Teatrit Kombëtar.

Ndoshta nga seance e sotme mund të mos zbardhej asgjë, por fakti që Kumbaro kishte marrë si “truprojë” Erjon Veliajn, tregon se në një farë mase ajo nuk ishte e gatshme të përballej me një çështje delikate, si ajo e Teatrit Kombëtar, ku dita ditës po zbulohet se interesi nuk është godina e re, por disa kulla shumëkatëshe që do të ngrihen në qendër të Tiranës, dhe në cep të tyre do të ngrihet edhe një ndërtesë dy apo 3 kate që do të shërbejë si teatër.

E kush mund të luante më mirë rolin e gaztorit në sallën e Kuvendit sesa Erion Veliaj? Askush tjetër, ndaj ai u shfaq në krah të ministres, bëri shoën e rradhës, dhe u largua atëherë kur ai vendosi për të ikur, i shoqëruar edhe nga punonjësit e gardës së Republikës, a thua se ishte kryeministër apo se rrezikohej shumë brenda Kuvendit.

Pas tij, iku edhe Kumbaro dhe deputetët e PS-së, anëtarë të Komisionit të Medias. Ata kishin një “arsye” të fortë për të ikur, loja e Erjonit përfundoi. Aktroi bukur, ndoshta shumë më bukur se disa nga aktorët që sot bërtasin më fort se Veliaj dhe Rama për prishjen e Teatrit Kombëtar.