ZBULIM I MADH/ Tek rastet e rënda me COVID-19, shkencëtarët britanikë…

Shkencëtarët britanikë kanë filluar testimin e mënyrës së shërimit i cili, shpresojnë ata, mund të arrijë parandalimin e pasojave më të rënda të infektimit me COVID-19, tek të sëmurët me pasqyrë të rënduar klinike.

Ata zbuluan se pacientët që vuajnë nga forma më e rëndë e COVID-19 kanë një nivel shumë të ulët të numrit të qelizave të sistemit imunologjik që quhen T-qeliza.

T-limfocitet ose T-qelizat, me B-limfocitet, janë qeliza të imunitetit të krijuar. Aktivizohen me rastin e kontaktit me antigjen, molekulë e cila nxitë krijimin e antitrupave, përkatësisht reagimit imunitar në organizëm, dhe kryejnë një funksion të spektrit të gjerë i cili aktivizon imunitetin e qelizave dhe rregullimin e përgjigjes imunologjike të organizmit.

Vlerësim i efektit të proteinës interleukin 7

Në studimin e ri klinik do të vlerësohet efekti i proteinës interleukin 7, i cili rritë numrin e T-qelizave dhe mund të ndihmojë në shërimin e pacientëve, raporton BBC, duke folur për studimin e kryesuar nga  shkencëtarët e Institutit Francis Crick, King’s College në Londër dhe Spitalit Guy’s and St Thomas.

Ata kanë studiuar gjakun e 60 pacientëve të sëmurë nga COVID-19 ku konstatuan rënien e madhe të T-qelizave.

Profesor Adrian Hayday nga Instituti Crick tha se ai dhe kolegët e tij ishin shumë të befasuar kur panë se çfarë po ndodhë me qelizat e imunitetit të krijuar.

“Ato bëjnë përpjekje që ta mbrojnë organizmin, por siç duket virusi vepron në atë mënyrë që i parandalon sepse numri i tyre është ulur dukshëm,” thekson Dr.Hayday duke shtuar:

“Në një mikrolitër (0,001 ml) pikë gjaku, një person i shëndoshë ka prej 2000 deri në 4000 T-limfocite. Tek pacientët e infektuar me COVID-19 që kemi testuar ishin vetëm 200 deri në 1200.”

Ky zbulim mund të jetë vendimtar

Shkencëtarët thonë se ky zbulim mund të hap rrugën për zhvillimin e testit për përcaktimin e nivelit të T-qelizave në gjak, që mund të jep dhe indikacione të hershme lidhur me atë se tek cili pacient do të zhvillohet forma e rëndë e sëmundjes.  

Rezultatet çojnë edhe në përfundimin se me mënyrën specifike të shërimit do të arrihet parandalimi i rënies së numrit të qelizave të sistemit imunologjik.

Këshilltari në repartin intensiv të Spitalit Guy’s and St Thomas’, Manu Shankar Hari, thotë se rreth 70 për qind e pacientëve të pranuar në këtë repart për shkak të COVID-19, atje mbërrijnë me 400 deri 800 limfocite për mikrolitër gjaku. Sapo fillojnë ta marrin veten, niveli i limfociteve fillon të rritet, shton ai.

Interleukin 7 i testuar tek një grup i vogël i pacientëve

Interleukin 7 tashmë është testuar tek një grup i vogël i pacientëve në gjendje septike dhe u konfirmua se rritë nivelin e këtyre qelizave.

Në kuadër të këtij studimi, shkencëtarët do ti japin pacientëve me numrin e ulët të limfociteve, interleukin 7, pacientë të cilët në repartin intensiv kanë kaluar më shumë se tre ditë.

“Shpresojmë, pasi që të rritet numri i qelizave, do të përmirësohet gjendja e përgjithshme e pacientëve. Si mjek në repartin e kujdesit intensiv, çdo ditë kujdesem për pacientët me gjendje të rëndë shëndetësore, për këtë arsye efikasiteti i kësaj mënyre të shërimit do të ishte shumë inkurajues tha Dr.Manu Shankar Hari.