Zbulohet pllaka në nderim të heroit Enver Zymeri

Në vendin ku para 13 vjetësh u vra nga kriminelët serbë polici i Kosovës, Enver Zymeri, sot është zbuluar një pllakë në nderim të veprës së tij.

I pranishëm në këtë ceremoni Kryeministri i Kosovës, Albin Kurti, tha se në vendin ku ka rënë heroikisht Enver Zymeri tani kemi lapidarin dhe flamurin e shtetit.

“Këtu e përuruam me drejtorin, ministrin, djalin e Enver Zymerit lapidarin kushtuar heroit të Kosovës, i cili me datën 3 prill, sivjet do të ishte 45 vjeç, mirëpo siç e dimë, në korrik të vitit 2011 ai u pat vra dhe në këtë vend ku ka rënë heroikisht tash e kemi lapidarin dhe flamurin e shtetit,” tha Albin Kurti pasi bëri homazhe te pllaka përkujtimore e heroit Enver Zymeri.

Në Zubin Potok, pranë vendit ku në korrik të vitit 2011 mbeti i vrarë, heroi Enver Zymeri, përveç Kryeministrit Albin Kurti homazhe bënë dhe ministri i Punëve të Brendshme, Xhelal Sveçla, drejtori i Policisë së Kosovës, Gazmend Hoxha dhe familjarët e heroit Enver Zymeri. 

Sot vizitën në veri Kryeministri Kurti e filloi në Komunën e Leposaviçit, me ç’rast ka bashkëbiseduar me këshilltarët komunalë dhe zyrtarët e kësaj komune.

“Bashkë me mua ishte ministri i Pushtetit Lokal, Elbert Krasniqi e po ashtu zëvendësministri për Komunitete dhe Kthim, Radoica Radomiroviç. Ishte edhe kryetari Lulzim Hetemi dhe nënkryetarja e komunës së Leposaviçit. Ju tregova për të arriturat 3-vjeçare të Qeverisë sonë që i kemi bërë për të gjithë pa dallim, se si kemi investuar në arsim, bujqësi, mbrojtje e siguri, në shëndetësi dhe shpreha zotimin tonë që ne e konsiderojmë Qeverinë e Repulikës së Kosovës si një infrastrukturë për të drejtat dhe mirëqenien e qytetarëve,” .

Në këtë vizitë, tha ai kërkoj bashkëpunim me ta pa privilegje e pa diskriminime, në mënyrë që nga ky bashkëbisedim të dalin idetë lidhur me ankesat e mundshme që i kanë se si mund të bëjmë edhe më shumë edhe më mirë.

“Prej komunës së Leposaviçit, e vizitova edhe vendin ku ka rënë heroi i Kosovës, rreshteri Afrim Bunjaku, te ajo ura ku u pat vendos ajo barrikada me maune që i kishin vendosur ata paramilitarët terroristë e kriminelë që mandej ikën. Prej komunës së Zveçanit ishim edhe në Zubin Potok, me  ç’rast në komunë vizituam agjencinë e regjistrimit civil dhe aty bashkëbiseduam me zyrtarët sa i përket regjistrimit civil, por në një zyrë tjetër ishin edhe ata për regjistrimin e automjeteve,” tha Kurti duke përfunduar:

Ndryshe, trenbëdhjetë vjet më parë Njësia Speciale e Policisë së Kosovës ndërmori një aksion për t’i vënë nën kontroll pikat kufitare në Jarinjeë dhe Bërnjak. Gjatë këtij aksioni u vra polici, Enver Zymeri nga strukturat ilegale serbe në veri.