Zbulohet shtatorja e atdhetarit, Shejh Myhedin Shehu

Kryeministri në largim i Kosovës, Ramush Haradinaj, pasi bëri homazhe te pllaka përkujtimore e Shejh Myhedin Shehut, në hyrje të Teqesë së Madhe, mori pjesë në Akademinë Përkujtimore dhe zbulimin e shtatores së atdhetarit, Shejh Myhedin Shehu, në 21 vjetorin e rënies së tij, ceremoni kjo e organizuar nën kujdesin e Zyrës së Kryeministrit.

Haradinaj, tha se një ngjarje si kjo i bën krenarë popujt, sepse sot janë  në vendin ku 21 vjet më parë ra heroikisht një udhëheqës fetar e shpirtëror dhe përveç petkut fetar e shpirtëror, në vete kishte brumin e atdhetarit të shquar shqiptarë, të rilindësit, por edhe të atyre që nuk u ndalën në kohë.

Haradinaj, kujtoi periudhën e pas vitit 1945, kur shumë atdhetarë, luftëtarë të zot e gjetën vetën në periudha të vështira se si të vazhdohet më tutje në shërbim të atdheut dhe të kombit.  

“Janë vetëm pak njerëz të kombit tonë që nuk u ndalën, është një brez i vogël i tyre dhe nuk është rastësi që në këta njerëz e gjejmë Shejh Myhedinin, i gjejmë shehlerët tjerë, ata që u dënuan në grup. Kjo për shkak se vetëdija e ngritur, devotshmëria, besimi i bëri që të mos dorëzohen, të mos bëjnë kompromis”, tha Haradinaj.

Më tej, Haradinaj tha se Shejh Myhedini është pjesë e atdhetarëve, e luftëtarëve, dijetarëve, që historianët do të kenë punë me të, për shkak se kur vlerësojnë pozicionimin, angazhimin e tij të asaj kohe dhe rrugën e tij nëpër këto etapa, secila etapë në vete do të jetë kapitull i  rëndësishëm i angazhimit për popull, për liri, për atdhe, për të qenë i liri në besim, në identitet.

Haradinaj tha se nuk është rastësi se pse Shejh Myhedini nuk e përfilli urdhrin e forcave serbe, të regjimit të Millosheviçit, që të vihet në anën e tyre për t’i bind popullin që të mos rezistojë, për ta larguar popullin nga UÇK, për ta bind UÇK-në që t’i ndalë operacionet e tyre luftarake, detyrat e tyre për liri, pra ai nuk e pranoj një rol të tillë, ai mbeti në rolin e vet që kishte, besnik ndaj besimtarëve të vet, besnik ndaj popullit, ndaj atyre që ishte dhe ndau fatin me ta në Teqenë e Madhe në Rahovec.

Me këtë rast, pasuesit të Teqesë, Shejh Besimit, Haradinaj i ka ndarë medaljen  “Gjergj Kastrioti Skënderbeu”.  

Kryetari i Komunës së Rahovecit, Smajl Latifi, tha se Shejh Myhedin Shehu do të kujtohet gjithmonë si udhëheqës shpirtëror e fetar, si patriot dhe hero i Kosovës.

“Shejh Myhedin Shehu vjen nga një familje e cila përfaqëson me dinjitet vlerat e larta shpirtërore dhe atdhetare, familje e cila ndër vite dhe në periudha të ndryshme ka dhënë kontribut të madh për çështjen kombëtare deri në lirinë dhe pavarësinë e popullit shqiptarë të Kosovës”, tha kryetari Ismajli.

Në këtë akademi të organizuar nën kujdesin e Zyrës së Kryeministrit, pjesëmarrës ishin edhe përfaqësues të tjerë institucionalë, kryetarë të komunave dhe deputetë të Parlamentit të Kosovës