Zbulon SMS-në e Kurtit dhe qëllimin e protestës Anti-NATO, Rama: Na futi Amerika, jo PD!

Kryeministri Edi Rama vazhdon dhe kalëron delirin duke zbuluar shumë gjëra që njerëzit i kishin me mëdyshje! Nga Rrogozhina filloi të flas si lider i kombit por si mjeshtër i shkarjes zbuloi dhe mesazhin që i kishte dërguar Kryeministri i Kosovës, Albin Kurti, ku i kërkonte vaksinimin Anticovid edhe të mësuesve.

Opozitën dhe PD i akuzoi si antishtet, dhe sot në 12-vjetorin e anëtarësimit në NATO tregoi se kundër kujt ishte protesta e organizuar nën moton Anti-NATO ditën kur Shqipëria u bë pjesë e Aleancës Veriatlantike. Sot Rama tha se Shqipërinë në NATO nuk e futi qeveria e PD por Amerika, pra protesta që organizoi ai si kryetar i PS ishte kundër Amerikës!

“Më çoi një mesazh kryeministri i Kosovës, Albin Kurti, duke më falënderuar, e duke më kërkuar që, meqë ata morën vaksina për mjekët, do dëshironte që ne të ndihmonim për mësuesit. Po, i thashë, patjetër, ne do t’i japim ato që duhen e mundet të vaksinohen edhe mësuesit e Kosovës. E si bëhen këto, me llafe e dëngla, duke fjetur gjumë,” Edi Rama duke marrë dhe monopolin e zotërimit të vaksinës Anticovid, pasi sipas tij, nëse qytetarët duan që të ndërpritet vaksinimi, le ta votojnë PD-në.

“Ne kemi ardhur këtu me një skuadër të re. Kryetari i Bashkisë së Rrogozhinës ka qenë në emigracion, e ka lënë për të ardhur e kontribuar këtu. Ju jeni njerëz që punoni tokën dhe e dini shumë mirë se ajo për të dhënë hyzmetin e saj, e do punën çdo ditë. Toka do jo vetëm punën, por edhe dijen, eksperiencën, bashkëpunimin. Betejat e vogla të çdo ditë janë ato që vendosin betejën e madhe të fitores. Opozita ka po atë program që ka pasur gjithë jetën, po ato fytyra, me një ndryshim, që tani Saliu është bërë shkesë, bashkë me Ilirin e Monikën dhe kanë nxjerrë një Gjino aty me demek si fytyrë e re dhe thonë hajde t’i japim një nuse. Nuk bëhet kështu. Për të shkuar tek e ardhmja duhet fituar çdo betejë e vogël, me durim, punë dhe besim. Kjo na dallon neve nga ata. Kjo është çështje karakteri. Shikoni çfarë bëjnë. Si mundet t’i besohet për një moment fati i këtij vendi, e ardhmja e këtij vendi, e çdo qyteti, çdo fshati, çdo familjeje, një njeriu, i cili është vënë aty si kukull. Një kukull që qesh, që gënjen pa asnjë gajle, një kukull që s’ka kurajon të thotë një fjalë, kur nga ana tjetër ai që e kurdis, Saliu, del dhe bën thirrje për mosbërjen e vaksinës. Bën thirrje, duke u thënë njerëzve se vaksina të vdes, se vaksinat janë të skaduara, të ndaluara atje ku janë prodhuar.”

Po, e habitshme është se si mund të broçkullis një njeri kaq shumë, por ky është Edi Rama që kërkon mandatin e tretë dhe pas timoniti e tepsisë, me vaksina në dorë tmerron njerëzit. E kur nuk i tmerron, i pataksë me ato që nxjerrë nga goja.

“Ky tjetri nuk flet fare. Sikur të dilte një nga skuadra jonë e të fliste, jo këto, se po të thoshte këto, dilte jashtë, nuk qëndronte dot më, por sikur të thoshte një fjalë sado të dyshimtë për këtë betejë, për këtë armë për të mundur armikun e padukshëm dhe unë të rrija pa folur! Një gjë duhet ta keni shumë të qartë, nëse doni të ndërpritet vaksinimi, shkoni votoni ata. Saliu thotë vaksina të vdes, ai tjetri, Peco Vasili nuk ka thënë gjë pa thënë, vetëm zi. Nëse sot ne jemi në këto kushte, po vaksinojmë në maksimum dhe është privilegji më i madh i gjithë jetës sime politike, kur shoh fytyrat e lehtësuara të gjyshërve e gjysheve pas vaksinimit, kjo nuk është bërë se erdhën vaksinat nga qielli, por është bërë me shumë këmbëngulje e duke lypur derë më derë, për të carë rrethimin nga BE, që na lanë jashtë e s’na thanë një dozë. Çfarë do bëja unë, do rrija të prisja? Ka vende të tjera përreth. Ne jemi shumë krenarë që po ndihmojmë edhe mjekët e Kosovës,” tha Kryeministri dhe ndonëse në momente krenarie filloi të akuzoi Opozitën se është antishteti.

“Me vjen shumë mirë që është organizuar ky takim. Ata që quhen analistë dhe dërdëllisin pa pushim, duke dhënë mend pa i thënë punës mirëmëngjes. Jeni ju baza e një transformimi që është i pamohueshëm në sektorin e bujqësisë që ka 2 fakte, që tregojnë se ne jemi në drejtimin e duhur. E para; në këto 7 vite e pak që jemi në krye të detyrës kemi dyfishuar sipërfaqen e tokës ku punohet. Sot jemi në 250 mijë. Ka ende sipërfaqe për t’u mbuluar me punë, ku ne duhet të arrijmë të çojmë kanalet kulluese dhe ujitëse. Më e madhja është bërë. Pjesa më e tmerrshme e një llumi që kishte mbuluar kanalet e bujqësisë, është lënë pas.

Shifra e dytë është shifra e prodhimit. Deri para 7 vitesh e kusur Shqipëria importonte 7 dhe eksportonte 1. Sot Shqipëria importon vetëm 3 dhe eksporton 1. Që do të thotë se rënia e importit të prodhimeve bujqësore lidhet me rritjen e prodhimit në vend. Ne i kemi çuar eksportet e bujqësisë nga 1 mln në 400 mln. Me planet tona do i çojmë në mbi 100 mld. Kjo do të thotë; më shumë të ardhura për ju. Ju e dini se shteti ka qenë në krahun tuaj. Qoftë me skemat kombëtare, qoftë me mbështetjen nga fondet. Kur morën detyrën Shqipëria ishte e fundit në Ballkan për thithjen e fondeve të BE për vendin. Ata që sot duan të kthehen prapë, nuk arrinin dot që të bënin një projekt për të marrë ato fonde.”

Dhe, pavarësisht se dashuri ballkanike e ka kriminelin serb Aleksandar Vuçiç, i cili vazhdon të jetë shumë para liderit, siç e quajti ai, global, si me zhvatjen e fondeve të BE ashtu dhe vaksinimit masiv të popullsisë, Edi Rama duke i ngatërruar fermët e sotëm të Rrogozhinës me ata të Enver Hoxhës, u foli shifra të paqena jo sot por në asnjë çast të pushtet socialist, që nga krijimi i shtetit shqiptar.

“Sot Shqipëria është e para për thithjen e fondeve nga BE. Kemi krijuar një agjenci europiane, atje me një mike tonën, që ka bërë skuadër fantastike për të ndihmuar fermerët. Ne duam të çojmë përpara punët e nisura, por na kanë dalë këtë xhakajdurët, si një shportë, mbledhur si para shkollave. Duke krijuar një tabor krushqish dhe duke e sorollatur nëpër Shqipëri. Ajo që po bën Basha bashkë me ata që organizojnë ato dasma pa nuse, është e turpshme, një rrumpallë kriminale, pasi ato janë vatra infektimi. Ne kemi ngritur në të gjithë Shqipërinë vatra vaksinimi. Jemi një nga vendet e rajonit që kemi ngritur vaksinimin masiv.

Do të dalin në mes të vendeve lartë në Europë për vaksinimin. Ata s’duan që t’ja dinë as për njerëzit e tyre. Janë aty me gishta, me flamuj, me ulërima. Ku kanë gjetur shesh bëjnë përshesh. Dy-tre javë do virusi që të zhvillohet dhe të kapi fytin. Unë uroj që asnjë prej tyre mos të përfundojë në spital e jo më të ndërroj jetë. Por ashtu siç veprohet, është e qartë për çdo shqiptar që ka dy mend në kokë, mesazhi është që ata janë antishteti. Janë rrumpalla, paaftësia dhe dëmi që i rri në kokë këtij vendi. Nuk kanë bërë një punë të hajrit. Sa herë e kanë marrë detyrën. Ndërkohë qëne kemi ardhur sot këtë me një skuadër me të re.”

Por sot në 12-vjetorin e anëtaërsimit në NATO, duke mohuar meritat e qeverisë së PD për anëtarësim në NATO zbuloi se pse kishte organizuar protestën Anti-NATO që lemerisi jo vetëm hajvanët e Paktit të Varshavës.

“Ju ka ngel goja ju futëm NATO, na futi Amerika jo këta!”

Dhe, pasi tregoi se Antiamerikan që është, ndonëse nuk po ndalonte me bërtitje, sharje dhe mallkime, ai akuzoi opozitën për këto karakteristika të fushatës së opozitë që vetëm nga goja e liderit të opozitës nuk dolën:

”Nuk kanë idenë çfarë do të thotë të drejtosh një vend, e t’i ulesh në gjunjë të tjerëve që kemi nevojë. Nuk dinë se si bëhen as miqësitë, e partneritetet, po vetëm dëngla Europa, Europa. Gjithçka bëjnë është kundër Europës. Nuk e duam Shqipërinë ta çojmë në Europë, po Europën ta sjellim këtu. Do ulim sigurimet shoqërore, do ulim pensionet. Nuk duhet të biem në kurth. Kanë çuar në Vlorë, atje në Vlorë, kanë çuar, në vend të shkojnë tu dërgojnë votrën, shkruajnë kallëzime për gfjithë punët publike. Duan të ndalojnë gjithë punët, Rindërtimin, vaksinimin. Se nuk është se ne nuk i njohim. Nuk e njihni Mediun? Fatmir Mediun, Dash Shehin nuk e njihni ju që edhe në televizor kur e sheh të zë rakia, e të duken ato sustat e telekomandës si ulli. Mesilën e njihni, ajo që do varte protestuesit tek palma, Dulen e njihni, po Nardin, se atë sigurisht që e njihni. Kur thonë jo shiko se, ça të shikoj, vetëm bërtet, shan, vetëm mallkojnë. Dhe për çfarë? E pra është koha për të qëndruar shumë drejt, do vazhdojmë përpara, të kryejmë punët, t’i çojmë para përpjekjet apo të shkojmë në gropë. Më thonë njëherë që morën detyrën dhe nuk e lanë më keq se çfarë e gjetën,” tha Kryetari i PS dhe kur të gjithë menduan se kishte harruar Presidentin e Republikës filloi diarrea:

“Meta flet me vete sa herë del në TV, e pa i thënë kush, një në tre fjalë e ka burg, burgu, burgu. ça i rreh mendja, e di vet. Berisha, Meta e Kryemadhi janë armiq të Drejtësisë së Re. S’mund të prodhojë toka kur punon një ditë, por duhet përditë, që fara të bëhet fidan, fidani pemë, pema të prodhojë e prodhimin ta marrësh,” tha Edi Rama për partnerin qeverisës me të cilin shkatërroi këtë të begat ndërsa përfundoi:

“Drejtësia, mbrojtja e saj është 25 prilli. Vazhdimi e përfundimi me luftën ndaj armikut të padukshëm është 25 prilli. Rindërtimi është 25 prilli. Rritja e eksporteve, është 25 prilli. Përrallat me mbret, do japim 1 mijë euro këtu, 500 euro këtu, 3 mijë euro andej, duhet t’ju kujtojnë Suden, Vehbiun, Xhaferrin. Nuk ka sot, s’ka pasur kurrë qofte ke daja. Sikush të ketë strehën e vet, të mbrohet, të vazhdojë punën e tij. është ndarje e prerë mes dy botëve, bota e vaksinimit dhe rindërtimit, punës, besimit e durimit dhe qokave, rrenave dhe bota e kalova lumin, mbaje vetë kalin.”