Zelenskyy në Podgoricë, Mali i Zi dhe Ukraina firmosin Marrëveshje Sigurie

Presidenti i Ukrainës, Volodymyr Zelenskyy, më 15 maj do të vizitojë Malin e Zi, ku në takim me Presidentin Jakov Milatoviç, pritet të firmosin dhe një Marrëveshje Sigurie brenda kuadrit të bashkëpunimit më të gjerë midis Ukrainës dhe vendeve anëtare të NATO-s.

Lajmin e bënë të ditur e përditshmja “Dan” duke saktësuar se bëhet fjalë për një Marrëveshje që Ukraina e ka firmosur edhe me disa shtete perëndimore si Mbretëria e Bashkuar, Gjermania, Franca dhe Italia.

“Me këtë akt, Mali i Zi do të konfirmojë mbështetjen e tij të fortë për integritetin territorial dhe sovranitetin e Ukrainës dhe do t’i bashkohet grupit të anëtarëve të NATO-s që kanë marrë tashmë angazhime sipas deklaratës së përbashkët të korrikut 2023,” citon Marrëveshjen “Dan” duke ju referuar burimeve nga Presidenca e Malit Zi ndërsa sqaron se qëllimi i këtyre marrëveshjeve është të ofrohet mbështetja afatgjate për Ukrainën në fushën e mbrojtjes dhe sigurisë, përmes ndihmës ushtarake, trajnimit, bashkëpunimit të inteligjencës dhe forcimit të qëndrueshmërisë së vendit e cila po përballet me agresionin rus.

Ndryshe, përmbajtja e Marrëveshjes do të bëhet publike pas firmosjes solemne më 15 Maj në Podgoricë.