Zeman kërkoi falje, Kandiç: Serbia pa mëshirë ka vrarë mbi 7 mijë civilë shqiptarë për 78 ditë!
Pasi Presidenti Milosh Zeman, i kërkoi falje Aleksandar Vuçiçit për pjesëmarrjen e Çekisë në kuadër të bombardimeve të NATO-s kundër Ish-Jugosllavisë, ka reaguar Drejtorja e Fondit për të Drejtën Humanitare në Beograd, Natasha Kandiç, duke theksuar se presidenti çek akoma nuk ka dëgjuar që ushtria dhe policia serbe pa mëshirë ka vrarë mbi 7 mijë civilë shqiptarë për 78 ditë.
“Presidenti çek kërkoi falje për bombardimin e Ish-Jugosllavisë dhe ‘ka zgjidhur traumën e tij shumë vjeçare’ duke kërkuar falje. Disa vite kanë kaluar dhe ai akoma s’ka dëgjuar që ushtria dhe policia e pamëshirshme e Serbisë ka vrarë mbi 7 mijë civilë shqiptarë për 78 ditë,” thekson Natasha Kandiç në reagimin e saj përmes rrjetit social Twitter pas faljes mallëngjyese të Zeamnit gjatë vizitës së Presidentit të Serbisë, Aleksandar Vuçiç, në Pragë.
Ndryshe, Presidenti i Çekisë, Milosh Zeman, duke kërkuar falje për përfshirjen e vendit të tij në sulmet ajrore të NATO-s gjatë luftës së Kosovës 1999, kohë kur ai ishte Kryeministër, tha se vendi i tij ishte “i fundit” në kuadër të NATO-s që dha miratimin për fushatën e bombardimeve.
Milosh Zeman, shërbeu si Kryeministër i Çekisë në periudhën 1998-2002 para se të merrte detyrën e presidentit në vitin 2013.
