Zgjedhen Nënkryetarët me përjashtim të atij serb, Lista Srpska bllokon konstituimin e Parlamentit Kosovës

Albulena Haxhiu e Lëvizjes Vetëvendosje, Vlora Çitaku e Partisë Demokratike, Kujtim Shala i Lidhjes Demokratike, dhe Emilia Rexhepi nga komunitetet joshumicë serbe janë zgjedhur nënkryetarë të Parlamentit të Kosovës.

Në procesin e votimit, nëntë deputetë të Listës Srpska abstenuan.

Mirëpo, procesi i konstituimit të plotë të Parlamentit është bllokuar tek zgjedhja e nënkryetarit nga komuniteti serb.

Lista Srpska ka insistuar në propozimin e Slavko Simiçit, por ai në tre raste nuk i ka marrë votat e shumicë së deputetëve.

LVV ka votuar kundër, PDK ka abstenuar, derisa LDK nuk ka marrë fare pjesë në votim.

Kryetari i Parlamentit, Dimal Basha, i ka kërkuar Listës Srpska që në frymën e aktgjykimit të fundit të Kushtetueses ta ndryshojë kandidatin, por një gjë të tillë deputetët e këtij subjekti politikë e kanë refuzuar.

Pas refuzimit të sërishim u bë votimi me short dhe kur asnjëri prej kandidatëve të Listës Srpska nuk mori votat të mjaftueshme u tërhoq emri i deputetit Nenad Rashiç.

Por, as deputeti Nenad Rashiç nuk arriti t’i merrte votat e mjaftueshme të deputetëve për nënkryetar të Parlamentit nga komuniteti serb, .

Nga 95 deputetë sa ishin në sallë, për votuan vetëm 55 deputetë, 1 kundër e 17 abstenime, të pamjaftueshme që të zgjidhej nënkryetar i Parlamentit.

Në këtë situatë, kryeparlamentari Dimal Basha ndëpreu seancën konstituive për të vazhduar të enjten.