Zgjedhja e Presidentit, Abdixhiku: Do të punojmë për interesin e Kosovës!

Pas homazheve në Kompleksin Memorial “Adem Jashari”, Kryetari i Lidhjes Demokratike të Kosovës, LDK, Lumir Abdixhiku, tha se të premten do të takohet me U.D. Presidenten Vjosa Osmani dhe Kryetarin e Lëvizjes Vetëvendosje, Albin Kurti ndërsa për çështjen e zgjedhjes së Presidentit u shpreh qartë se do të punojë për interesin e Republikës së Kosovës.

“Besojmë që gjatë javës do të kemi konsolidimin e gjitha organeve drejtuese të LDK dhe më pas do të zhvillojmë dhe konsultimet tona të brendshme dhe zhvillimet politike në vend. Ajo çfarë mund të them se takimin e radhës e kemi të konfirmuar me ushtruesen e detyrës së presidentit dhe kryeartin e VV për këtë të premte 14:30 siç kemi propozuar dhe jemi dakorduar. Deri në këtë kohë do të zhvillojmë diskutime me akterët e brendshëm të LDK-së,” tha Abdixhiku ndërsa u sqarua edhe për qëndimin e LDK-së në procesin e zgjedhjes së Presidentit të Kosovës:

“Meqenëse jemi në këtë tempull këtu mesazhi që dua të përçojë është që do të punojmë për interesin e republikës së Kosovës. Ky interes nënkupton që do të jemi konstruktiv të jemi të afër ndërmjet vete duke i projektuar idetë tona dhe njëkohësisht duke iu shërbyer institucioneve të Republikës së Kosovës, institucionet që janë ndërtuar me sakrificë të madhe të njerëzve tanë në të shkuarën. Prandaj do të jemi konstruktiv duke mbrojtur idetë dhe pozicionet dhe idealet e Lidhjes Demokratike të Kosovës.” 

Ndryshe, Presidentja e Kosovës, Vjosa Osmani dhe kryetari i Lëvizjes Vetëvendosje, Albin Kurti, deri më tani kanë zhvilluar konsultime për formimin e institucioneve me ushtruesin e detyrës së kryetarit të PDK-së, Enver Hoxhaj dhe kryetarin e AAK-së, Ramush Haradinaj.