Presidenti i ri/ Dështon Albin Kurti, Presidentja e Kosovës shpërndan Parlamentin
Pas dështimit të Albin Kurtit me Lëvizjen e tij “Vetëvendosje” që të zgjedh Presidentin e ri deri në ditën e fundit kushtetuese, 5 Mars 2026, sot, Presidentja e Kosovës, Vjosa Osmani, ka dekretuar shpërndarjen e Parlamentit të Kosovës duke e çuar vendin drejt zgjedhjeve të reja.
“Jam këtu para jush sepse përfaqësuesit e popullit mbrëmë vendosën që ta dërgojnë vendin në zgjedhje të reja. Kjo situatë ka qenë e evitueshme. Është fatkeqësi e madhe që ata nuk zgjodhën interesin e Kosovës,” tha Vjosa Osmani, duke bërë të ditur se në përputhje me kompetencat kushtetuese, ka nxjerrë Dekretin.
“Prandaj sot, në përputhje me kompetencat e mia kushtetuese, kam nxjerrë dekretin për shpërndarjen e Kuvendit!”
Duke folur për dështimin e përpjekjeve për zgjedhjen e presidentit mbrëmjen e 5 marsit, Presidentja Vjosa Osmani tha se kjo nuk ka qenë një situatë e rastësishme, por sipas saj një kalkulim i menduar politik.
“Në një Republikë kushtetuese ka diçka që është mbi kalkulimet partiake dhe mbi interesat e momentit: Kushtetuta e Republikës së Kosovës. Kushtetuta nuk është tekst ceremonial. Ajo është kontrata jonë e përbashkët si shtet. Është kufiri që politika nuk mund ta kalojë dhe busulla që institucionet nuk mund ta humbasin,” tha Presidentja e Kosovës, Vjosa Osmani duke përfunduar:
“Mbrëmë, përpjekjet për zgjedhjen e një presidenti të ri dështuan. Ky dështim nuk ishte as i rastësishëm, as i pamenduar, por përkundrazi shumë mirë i kalkuluar dhe i ideuar, për fat të keq.”
Tani, pas konslutimit me partitë politike, Presidentja e Kosovës, Vjosa Osmani, pritet të caktoj datën e zgjedhjeve parlamentare, të tretat vetëm brenda një viti, për shkak të marrëzisë politike që vazhdon dhe prodhon Kosova
Ndryshe, kriza politike në të cilën sot u mbyt Kosova ka vetëm një shkaktar, Albin Kurtin, gjithçka çfarë ndodhi deri në mesnatën e 5 Marsit është turpi dhe faqja e tij e zezë!
Nga shpërfillja e partnerëve politik, korrektesa e liderit të opozitës Bedri Hamza e deri mbrëmjen e djeshme te Kushtetuta e Kosovës, për të cilën ishte i gatshëm edhe ta ndryshoj me propozimin absurd për zgjedhjen e Presidentit nga Populli, vetëm 3 orë para se ti skadoj afati kushtetuese për zgjedhjen e Presidentit të ri, përveç paaftësisë dëshmoi edhe shkaktarin kryesor të kësaj krize, dehjen nga pushteti i madh i Albin Kurtit!
Qershinë mbi tortë e vendosi Kryetarja e Parlamentit, Albulena Haxhiu duke ju drejtuar Gjykatës Kushtetuese, “e tmerruar” pse deputetët e opozitës nuk votojnë Presidentin që do Albini, dhe, jo pse Kurti nuk përfill opozitën, në veçanti paraqitjen konstruktive të Kryetarit të PDK, Bedri Hamza, dhe kërkon nga Kushtetuesja që të pezulloj afatit kushtetues që lidhet me procedurën e zgjedhjes së Presidentit, deri në publikimin e Aktgjykimit, pra, deri në fundin e marrëzisë presidenciale “Vetëvendosje”.
