Zgjedhjet e 11 Majit, Komisioni Rregullator miraton karakteristikat e fletëve të votimit për Shqipëri

Komisioni Rregullator i KQZ ka miratuar sot karakteristikat teknike të fletës së votimit për zgjedhjet parlamentare të 11 majit në Shqipëri.

“Ngjyra dhe trashësia e fletës duhet të jetë e tillë sa të mos jetë e mundur leximi i shkrimit në pjesën e pasme. Përmban kode identifikues që nuk lexohen me sy të lirë, siç është QR Kodi.

Komisioni Rregullator nuk mund shprehet në mënyrë shteruese për dimensionin e fletës, sepse do duhet të përcaktohen kur regjistrohen subjektet zgjedhore. Kjo përmasë përcaktohet në një moment të dytë.

Letra do të jetë letër e thurur me dy shtresa e cila ka disa fibra karboni të cilat shihen me sy të lirë. Dendësia duhet të jetë jo më e vogël se 90 gr për metër katror,” ishin disa nga detajet për të cilat është rënë dakord për fletët që do të përdoren brenda vendit.

Ndërkohë ajo që është risi këtë vit, është vota e diasporës, për të cilën Komisioni Rregullator nuk mori një vendim. Për këtë do të merret një vendim në një mbledhje të mëvonshme, pasi akronimi “VJ” që u propozua të ishte si shenjë dalluese, u vlerësua se nuk ishte shumë e qartë.