Zgjedhjet e 11 majit, Qeveria zgjat afatin për pasaportat dhe ID-të e skaduara

Këshilli i Ministrave sot ka miratuar Aktin për të zgjatjen e afatit të vlefshmërisë së dokumenteve të identifikimit deri më 31 maj 2025.

Duke bërë të ditur Vendimin, Ministri i Brendshëm, Ervin Hoxha, tha se janë rreth 500 shqiptarë që iu ka përfunduar vlefshmëria e dokumenteve të identifikimit, dhe tashmë do të mund të votojnë në zgjedhjet parlamentare të 11 Majit.

“Sot Këshilli i Ministrave vendosi për zgjatjen e afatit për vlefshmërinë e dokumenteve të identifikimit, që do të zgjidhë shumë shpejt të gjithë këtë ngërçin e krijuar, janë rreth 500 mijë shtetas shqiptarë që u ka përfunduar vlefshmëria e dokumenteve të identifikimit.

Në këtë mënyrë, me miratimin e këtij Akti, do të kenë mundësinë të gjithë shtetasit shqiptarë që jetojnë jashtë vendit, për të ushtruar të drejtën e votës si e drejtë kushtetuese,” u shpreh Ervin Hoxha.

Nuk dihet se kush e ka autorizuar ministrin Ervin Hoxha, por ai me këtë rast hodhi poshtë kërkesën e PD për një ndryshim në Kod Zgjedhor për të lejuar shqiptarët që jetojnë jashtë dhe nuk kanë dokument identifikimi shqiptar, të regjistrohen për votim me dokument të huaj.

“Kjo nuk është e mundur të bëhet pasi ligji nuk e parashikon. Të gjithë shtetasit shqiptarë, të cilët kanë kartë identiteti dhe pasaporta biometrike të pavlefshme, pas miratimit të aktit që ne bëmë sot, do të kenë mundësi të regjistrohen në platformën e KQZ sipas udhëzimeve,” ishte i prerë Ministri i Brendshëm, Ervin Hoxha, duke hedhur poshtë me arrogancë një kërkesë gjithashtu të prerë të Partisë Demokratike.