Zgjedhjet e 14 majit, KQZ përcakton partitë politike që propozojnë anëtarët dhe sekretarët e KZAZ-ve

Komisioni Qendror i Zgjedhjeve, KQZ, ka nisur procedurat e për përgatitjen e zgjedhjeve të 14 majit duke përcaktuar partitë politike që do të propozojnë anëtarët dhe sekretarët e KZAZ-ve, për zgjedhjet për organet e qeverisjes vendore.

Në zgjedhjet e datës 14 maj 2023, dy anëtarë në çdo KZAZ propozohen nga Partia Socialiste e Shqipërisë, një anëtar në çdo KZAZ propozohet nga Partia Socialdemokrate; dy anëtarë në çdo KZAZ do të propozohen nga Partia Demokratike e Shqipërisë; një anëtar në çdo KZAZ do të propozohet nga Partia e Lirisë.

Anëtari i shtatë i KZAZ-ve do të propozohet në përputhje me rezultatet e shortit të hedhur në KQZ, ndërmjet Partisë Socialiste dhe Partisë Demokratike.

Sekretari i KZAZ-së do të propozohet nga Partia Socialiste në KZAZ-të ku PS ka propozuar zëvendëskryetarin e KZAZ dhe Partia Demokratike në KZAZ-të, ku PD ka propozuar zëvendëskyetarin e KZAZ-së.

Komisioneri Shtetëror i Zgjedhjeve miratoi formatin dhe specifikimet e vulës së KZAZ-së, KQV-së, kryetarit të KQV-së dhe vulës rezervë për KQV-në.

Vendimmarrja për rregullat për raportimin financiar vjetor të partive politike, miratimin e formatit të standardizuar për raportimin financiar të partive politike gjatë vitit kalendarik, kontrollin, verifikimin e financimeve dhe shpenzimeve të tyre, si dhe mënyrën e pagesës së audituesve ligjorë, u shty për në seancën e radhës.