Zgjedhjet e 23 prillit në veri, Albin Kurti kërkon pjesëmarrje e jo bojkot

Zgjedhjet e lira dhe të drejta, e pluralizmi politik janë parakusht i demokracisë. Kështu ka deklaruar kryeministri i Kosovës, Albin Kurti në takimin që zhvilloi në zyrën e tij me kandidaten për kryetare të Komunës së Zveçanit, Sladjana Pantić.

“Në zgjedhjet e prillit të këtij viti në katër komunat veriore të Republikës së Kosovës, qytetarët kanë mundësinë të krijojnë zë të fuqishëm përmes përfaqësuesve të zgjedhur e të jenë pjesë e vendimmarrjes. Kështu qytetarët tregojnë fuqinë e tyre brenda një shteti demokratik si Kosova,” është Albin Kurti duke shtuar se pjesëmarrja dhe jo bojkoti kontribuon edhe zhvillimin e demokracisë dhe adresimin e nevojave të komunitetit.

Ndryshe, zgjedhjet e jashtëzakonshme për kryetarët e Mitrovicës së Veriut, Leposaviçit, Zveçanit dhe Zubin Potokut janë shpallur për 23 prill. Këto zgjedhje pasojnë dorëheqjet e kryetarëve të këtyre komunave nga Lista Serbe, e cila si revoltë ndaj vendimit të Qeverisë së Kosovës për të zbatuar procesin e riregjistrimit nga targat serbe në ato të Kosovës, kishin lëshuar institucionet.

Këto zgjedhje fillimisht ishin caktuar të mbahen në dhjetorin e kaluar, por me kërkesë të bashkësisë ndërkombëtare janë shtyrë për 23 prill. Edhe kësaj here sikurse në dhjetor, Lista Serbe ka refuzuar të marrë pjesë në këto zgjedhje. Ky veprim ka shtyrë edhe vendet e pesëshes diplomatike të Quintit që të reagojnë.

Quinti, Shtetet e Bashkuara, Britania e Madhe, Gjermania, Franca dhe Italia, ka shprehë keqardhje që Lista Srpska nuk e ka shfrytëzuar të drejtën demokratike për marrin pjesë në këto zgjedhje.