Zgjedhjet e 23 Prillit në veri, Kurti: Bojkoti i imponuar nga kërcënimet e Beogradit

Duke falënderuar Komisionin Qendror të Zgjedhjeve për organizimin e zgjedhjeve për kryetar në katër komunat në veri të Kosovës dhe për dy kuvendet komunale, Kryeministri Albin Kurti shprehu falënderimet e tij për policinë e Kosovës për sigurinë dhe qytetarët për mbështetjen.

Mirëpo, Kryeministri i Kosovës shprehu keqardhjen e tij për atmosferën e frikësimit dhe shantazhit që ka ndikuar në daljen e qytetarëve në zgjedhje.

“Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë,” u shpreh Kurti përmes rrjetit social Facebook ndërsa uroi kryetarët dhe asamblistët e zgjedhur duke i inkurajuar të punojnë me përkushtim dhe të shërbejnë pa dallim.

“Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre”, ka shtuar Kurti.

Ndryshe, në zgjedhjet e djeshme në katër komunat në veri kanë marrë pjesë 1567 qytetarë apo 3.47 për qind, nga gjithsej 45 mijë qytetarë me të drejtë vote.

Sipas rezultateve paraprake, Lulzim Hetemi nga Lëvizja Vetëvendosje, ka fituar në Leposaviç, Erden Atiç poashtu nga Lëvizja Vetëvendosje në Mitrovicën e Veriut. Në Zubin Potok, fitues ka dalë Izmir Zeqiri nga Partia Demokratike e Kosovës, derisa në Zveçan, Ilir Peci, po ashtu nga ky subjekt politik.

Deklaratë e Qeverisë së Kosovës:

Në Komunën Veriore të Mitrovicës, atë të Zveçanit, Zubin Potokut dhe të Leposaviqit, dje u mbajtën zgjedhjet lokale, mbarëvajtja e të cilave ishte e qetë, paqësore dhe pa incidente.

Komisioni Qendror i Zgjedhjeve dhe Policia e Kosovës ishin në krye të detyrës në organizimin dhe ofrimin e kushteve të përshtatshme për ushtrimin e të drejtës për votë. Fushata kërcënuese e orkestruara nga Beogradi zyrtar e e ekzekutuar përmes frikësimit, presionit dhe shantazhit nga instrumentet kriminale në terren ndikuan në dalje të ulët të qytetarëve në këto zgjedhje.

Krahas institucioneve për punën e tyre, falënderojmë qytetarët për kurajën dhe qetësinë. Zgjedhjet janë manifestim i demokracisë, të cilat përveçse e drejtë e qytetarëve, janë obligim e përgjegjësi që burojnë nga kushtetutshmëria dhe ligjshmëria e vendit. Në të njëjtën kohë, janë domosdoshmëri për garantimin e funksionimit normal të institucioneve shtetërore dhe sigurimin e shërbimeve publike ndaj qytetarëve.

Kryetarëve dhe asamblistëve të sapo zgjedhur në këto komuna u urojmë punë të mbarë dhe suksese në detyrat dhe përgjegjësitë e reja. Qeveria e Republikës së Kosovës u ofron mbështetjen e plotë të saj në shërbim të qytetarëve, pa dallim.