Zgjedhjet e 25 Prillit/ KQZ miraton rezultatin në Qarkun Kukës, PD fituese me 62.27%
Komisioni Qendror i Zgjedhjeve sot ka miratuar rezultatin e zgjedhjeve për Qarkun Kukës, si për subjektet politike, ashtu edhe për kandidatët, ku Partia Demokratike fitoi 2 mandate – Flamur Hoxha dhe Isuf Çelaj, ndërsa Partia Socialiste 1mandat – Genta Duraku.
Sipas tabelës së mbërritur në KQZ, në Qarkun Kukës votuan 40.894 zgjedhës, ku vota të pavlefshme dolën 2.188. PD mori 2 mandate me 62.27% të votave, ndërsa PS mori 1 mandat me 35.84 %.
Në mbledhjen e KQZ nuk pati asnjë kundërshtim nga përfaqësuesit e partive politike për rezultatin. Kështu, KQZ miratoi projektvendimin “Për miratimin e tabelës për rezultatin e votimit në zonën zgjedhore qarku Kukës, për subjektet zgjedhore dhe për kandidatët për deputetë për zgjedhjet për Kuvendin e Shqipërisë të datës 25 prill 2021”.
Sot Komisioneri shqyrtoi rezultatet e verifikimit të Thelluar të Prokurorisë së Përgjithshme për z. Artur ismail Baku, kandidat për deputet i subjektit zgjedhor, Partia Lëvizja Socialiste për Integrim, qarku Durrës, z. Napolon Engjëll Laska, kandidat për deputet i subjektit zgjedhor “Nisma Thurje”, qarku Tiranë dhe z. Adrian Vullnet Gjoka, kandidat për deputet i subjektit zgjedhor “Lëvizja për ndryshim”, qarku Vlorë, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publik.
Komisioneri konstatoi se Z. Artur Ismail Baku, z. Napolon Engjëll Laska dhe Ardian Vullnet Gjoka nuk përfshihen në kushtet e ndalimit të parashikuar nga ligji i dekriminalizimit.
Gjithashtu vendosi plotësimin e vakancave të krijuara në këshillin e bashkisë Kamëz, me kandidatin nga lista shumemërore e Partisë Socialiste të Shqipërisë, zj. Emigena Xhetan Damzi dhe në këshillin e bashkisë Lezhë, me kandidatin nga lista shumemërore e Partisë Socialiste të Shqipërisë, z. Gjin Ndrec Kola.
Shqyrtimi i rezultatit të verifikimit të Prokurorisë të Përgjithshëm për subjektin vetëdeklarues z. Zef Kin Hila, kandidat për deputet i subjektit zgjedhor, “Partia Demokratike e Shqipërisë – Aleanca për Ndryshim (PD – AN)”, qarku Shkodër, do të bëhet në mbledhjen e ardhshme.
