Zgjedhjet e 25 Prillit në KAS, rrëzohen kërkesat e PD dhe LSI për prova të tjera
Komisioni i Ankimimeve dhe Sanksioneve, KAS, ka vendosur sot që të pranojë kërkesën ankimore të PD-LSI dhe kandidatit të pavarur Kreshnik Merxhani për shqyrtimin e provave të paraqitura nga palët lidhur me shkeljet në zgjedhjet e 25 prillit në Gjirokastër.
Por, KAS ka rrëzuar kërkesat e PD-LSI dhe kandidatit Merxhani për të marrë prova shtesë nga institucionet ligjzbatuese si për emgirantët, në Polici apo Prokurori që kanë të bëjnë me zgjedhjet e 25 prillit. Ndërkohë dy anëtarërt e KAS, Braho dhe Çefa kërkojnë informacion nga KQZ lidhur me të dhënat që kryqëzohen nga pajisja për identifikimin elektronik të zgjedhjeve.
“KAS u tërhoq në lidhje me provat që palët kanë depozituar së bashku me kërkesat ankimore dhe për të qartësuar, në lidhje me provat, të gjitha ato do të pranohen për shqyrtim. Ndërkohë që për kërkesat u vendos me shumicë votash rrëzimi i kërkesës së LSI në lidhje me provat që kërkon të merret. Dy anëtarë të KAS, unë dhe z. Çefa i kërkojmë administratës të KQZ, që të na vërë në dispozicion nëse personat që gjenden në lista janë pjesë e administratës zgjedhore duke filluar nga dita e zgjedhjeve deri në shpalljen e rezultateve,” tha Braho ndërsa kërkesa për marrjen e provave u rrëzua:
“Në lidhje me kërkesën e subjektit zgjedhor PD-AN, po ashtu KAS vendosi me shumicë votash rrëzimin e kërkesave për marrjen e provave që kërkohen nga ky subjekt. Në lidhje me kërkesat për prova të kandidatit Kreshnik Merxhani u vendos me shumicë votash rrëzimi i kërkesës.”
Ndryshe, sot PD-AN kërkoi pranë KAS, Pavlefshmërinë e zgjedhjeve të zhvilluara në datën 25.04.2021 në zonën zgjedhore, Qarku Gjirokastër dhe Urdhërimin e përsëritjes së zgjedhjeve për Parlamentin e Shqipërisë në të gjithë zonën zgjedhore, Qarku Gjirokastër në periudhën më të afërt zgjedhore.
Më 14 maj KAS pritet që të shqyrtojë ankesat e paraqitura për Qarkun Berat.
