Zgjedhjet e 25 Prillit/ Nisin hetimet, Celibashi: SPAK, 10 kërkesa në KQZ!

SPAK dhe Policia ka depozituar në Komisionin Qendror të zgjedhjeve 10 kërkesa për informacion dhe 2 vendime për sekuestrime të materialeve zgjedhore të zgjedhjeve të 25 Prillit, ka bërë të ditur kryetari i KQZ, Ilirjan Celibashi, duke publikuar fillimin e hetimeve ndërsa pas mbylljes së procesit të shqyrtimit të ankimeve administrative, Celibashi thotë se institucioni që ai drejton do të referojë në Prokurori të gjitha rastet e dyshimta të shkeljeve zgjedhore.

“Për zgjedhjet e 25prillit 2021 në KQZ janë depozituar 10 kërkesa për informacion dhe 2 vendime për sekuestrime të materialeve zgjedhore nga SPAK si dhe Prokuroria Tiranë, Gjirokastër, Pukë, Vlorë dhe Elbasan. Pamje filmike të procesit të numërimit janë kërkuar edhe nga Policia e Tiranës,” thekson Ilirjan Celibashi përmes rrjetit social Twitter duke saktësuar se për çfarë kanë nisur hetimet:

“Për zgjedhjet e 25prillit 2021 kanë nisur hetimet për: Falsifikim të materialit zgjedhor & rezultateve të zgjedhjeve, pengimi i subjekteve zgjedhore, Votimi më shumë se një herë/pa u identifikuar.” Dhe jo vetëm kaq!

“Hetime edhe për: Shkeljen e fshehtësisë së votimit, Korrupsionin aktiv në zgjedhje, kanosje/dhunim të pjesëmarrësve në zgjedhje, marrje ose përdorim të paligjshëm i dokumenteve të identifikimit,” tha kreu i KQZ, Ilirja Celibashi, duke siguruar se KQZ do të referojë në Prokurori të gjitha rastet e dyshimta të shkeljeve zgjedhore:

“Pas mbylljes së procesit të shqyrtimit të ankimeve administrative për zgjedhjet e 25prill2021, KQZ do të referojë në Prokurori të gjitha rastet e dyshimta të shkeljeve zgjedhore.”