Zgjedhjet e 6 Marsit, Celibashi: Ata që angazhohen në shit-blerje votash, do të përballen me pasoja

Dy ditë para zgjedhjeve të pjesshme vendore të 6 Marsit, kreu i Komisionit Shtetëror të Zgjedhjeve, Ilirjan Celibashi, tha se KQZ ka marrë të gjitha masat, që procesi zgjedhor të ecë mirë, ndërsa paralajmëroi ata që do të tentojnë të cënojnë vullnetin e lirë të qytetarëve apo do të angazhohen në shit-blerje votash, do të përballen me pasoja.

“Ju bëj me dije se ka kaluar akti normativ, që shtyn vlefshmërinë e dokumenteve të identifikimit, kështu që edhe për këto zgjedhje, ata qytetarë që kanë pasur një dokument identifikimi të skaduar apo ju skadon më 6 mars, është vendosur shtyrja e afatit të vlefshmërisë së tyre dhe ata do lejohen të votojnë. Jemi në fazën përmbyllëse të përgatitjes së këtyre zgjedhjeve. Kemi shpërndarë bazën materiale thuajse në të gjitha KZAZ-të, me përjashtim të një KZAZ-je në Shkodër. Jemi në fazën e përzgjedhjes së komisionerëve.

Partitë e kanë bërë të drejtë të tyre të pakontestueshme që bëjnë ndryshimin e komisionerëve dy-tre ditë para zgjedhjeve. Por, ne shpresojmë që deri nesër t’i kemi dhe anëtarët e KZAZ-ve, pasi prania e tyre lidhet direkt me procesin e shpërndarjes së bazës materiale,” tha Ilirjan Celibashi duke e pranuar se ka probleme në këtë proces, por shpreson se gjatë pasdites ky proces të finalizohet.

Në lidhje me shpërndarjen e bazës materiale, Celibashi duke ju referuar raportimeve nga terreni nga KZAZ-të dhe inspektorët, tha se ka probleme dhe mund të ketë probleme në shpërndarjen e bazës materiale në disa zona të thella të Shkodrës, madje foli për një kërkesë të arsyeshme dhe të logjikshme të Kryetares së Bashkisë, Voltana Ademi, e cila nuk mund të plotësohet sepse nuk mbështetet në ligj.

“Kemi pasur një kërkesë nga ana e kryetares në detyrë të Bashkisë Shkodër, Voltana Ademi, për të bërë transferimin e vendndodhjes së rreth 12 qendrave votimi, ku ka vështirësi aksesi, në rrethinat e Shkodrës. Kjo kërkesë, edhe pse ka qenë e arsyeshme dhe e logjikshme, por sa kohë nuk gjeti mbështetjen në ligj, nuk e kemi pranuar. Ne nuk mund të miratonim zhvendosjen e tyre gati 50 kilometra larg. Ky është një problem i ligjit, që ndoshta do duhet ta adresojë reforma zgjedhore. Problematika ngelet për të paktën dy zona të thella të Shkodrës, Shala dhe Pulti. Ka qenë problem edhe Boga e Thethi, por kemi marrë informacion që aty rrugët janë të hapura dhe mund të dërgojmë bazën materiale. Ngelet për t’u parë në këto dy njësitë e tjera administrative, ku për shkak të kushteve atmosferike mund të kemi probleme për transferimin e bazës materiale, por edhe me vendosjen në funksion të komisioneve të qendrave të votimit. Ne do të marrim të gjitha masat, që të mos kemi probleme, që lidhen me administrimin e procesit zgjedhor.”

Edhe në këto zgjedhje do të zhvillohet identifikimi elektronik i votuesve dhe në zonën e Bashkisë Vorë do të zhvillohet votimi elektronik, tha kreu i Komisionit Shtetëror të Zgjedhjeve, duke informuar se sot në orën 14:00, KQZ do të zhvillojë procesin e testimit operacional të pajisjeve të votimit elektronik në Vorë.

“Nuk ka asnjë lloj shkaku apo preteksti për dikë që të dyshojë apo vërë në diskutim sigurinë e votës, nga cdo pikëpamje e këtij procesi. I ftoj qytetarët e Vorës që të marrin pjesë në votime dhe të mos kenë asnjë lloj droje për sigurinë e votës. Kjo thirrje vlen për të gjithë votuesit e pesë bashkive të tjera, për të marrë pjesë në votime, duke i garantuar për një proces të përgatitur nga KQZ në përputhje me të gjitha parashikimet e Kodit Zgjedhor,” tha kreu i Komisionit Shtetëror të Zgjedhjeve, Ilirjan Celibashi, duke paralajmëruar se KQZ do të ketë vëmendje të shtuar në këto zgjedhje ndaj disa elementeve negative, të klasifikuara si kriminale ndërsa përfundoi:

“Çdokush që do të angazhohet në një proces të shit-blerjes së votës, apo ndikim tjetër mbi vullnetin e qytetarëve, do të ketë pasoja. Nuk më vjen mirë ta sjell në vëmendje, por tashmë një pjesë jo e vogël e atyre rasteve e personave, të cilët KQZ i ka evidentuar si në shkelje të kodit zgjedhor, janë duke u ballafaquar me organet e drejtësisë. Ftoj të gjithë ata që evidentojnë shkelje, t’i denoncojnë ato.”.