Zgjedhjet e 6 Marsit/ Opozita në proces agonie me dy kufoma, Rama: Ne jemi njëshat!
Aleancë vetëm me qytetarët në zgjedhjet e pjesshme vendore më 6 Mars, tha Kryeministri Edi Rama pas mbledhjes së Kryesisë së Partisë Socialiste duke shtuar se opozita është në një proces agonie me dy kufoma ndërsa socialistat janë njëshat.
Në funksion të Aleancës me qytetarin, tha Rama, do të jetë Këshillimi Kombëtar ndërsa hodhi poshtë çdo mundësi të dytë për kandidatë si Valdrin Pjetri duke shtuar se PS nuk i jep mundësi të dyta askujt që ka gënjyer qytetarët për një aspekt kaq të rëndësishëm.
“Jemi në aleancë me qytetarët. Këshillimi Kombëtar është për të shtrirë këtë aleancë. këshilli kombëtar nuk është një proces regjistrimi, por ndërveprimi mes një qeverie dhe meje që duam të jemi këtë mandat të tretë pranë gjithëve pa përjashtim dhe qytetarët që do e votojnë apo jo. Në këtë sens, do të shkojmë në këto zgjedhje me të njëjtën frymë. Do të kërkojmë vota nga qytetarët,” tha Edi Rama në delir si për fatin e socialistëve më 6 Mars ashtu dhe opozitës”
“Unë jam më i angazhuar se e kam mendjen te Këshillimi Kombëtar sepse është hera e parë. Ta gjykojmë nismën në bazë të produktit që jep. Sa i përket këtyre zgjedhjeve ne jemi PS, ne jemi njëshat, kështu që njëshat nuk hyjnë për të bërë dysh sepse i bie të përkulet, por këto janë zgjedhje që kanë rëndësinë e tyre. Kanë patjetër nga ana jonë si objektiv fitoren. Sa i përket opozitës, nuk do të doja të merresha. Opozita është në një proces agonie me dy kufoma. Kështu që është për të qarë halli.”
Valdrin Pjetri i cili u kap nga dekriminalizimi dhe sot thotë që është i pastër ishte i hapur për një mundësi të dytë nëse i jipet por Kryeministri Rama sot ishte i qartë në këtë pikë:
“Shanset e dyta mund ti japim njëri-tjetrit kur jemi miq e kur miqësia lëndohet dhe shanset e dyta i jep më pas Zoti, dnërsa PS nuk i jep mundësi të dyta askujt të atyre që kanë gënjyer qytetarët për një aspekt kaq të rëndësishëm. Nuk ka shanse të dyta për askënd.”
Në fund, kur u pyet për parashikimin e bashkive ku PS do fitoj në zgjedhjet e pjesshme vendore të 6 Marsi, Kryetari i Partisë Socialiste dhe Kryeministri Edi Rama ishte i prerë”
“Ne jemi PS, jemi kampionët që gjithmonë hyjnë për të fituar dhe nuk kanë rezultat tjetër veç fitores. Këto janë zgjedhje vendore, nuk do të bëjmë luftë për jetë a vdekje, për një betejë që do të mbulojë ekranet nga mëngjesi deri në darkë. Do të fokusohem te këshillimi kombëtar. Do të bëjmë detyrat tona sipas kalendarit të organizimit për të qenë të pranishëm në këto komunitetet, por nuk jemi në kushtet ku është e nevojshme të bëjmë parashikime të kësaj natyre, ato ishin të arsyeshme nga analiza të thella që ne bëjmë.”
