Zgjedhjet e 6 Marsit, sot nis zyrtarisht fushata zgjedhore. Mesazhi i…

Sot nis zyrtarisht fushata zgjedhore për zgjedhjet e pjesshme vendore të 6 marsit, me ç’rast Komisioneri Shtetëror i Zgjedhjeve, Ilirjan Celibazhi përmes një mesazhi rikujton subjektet e regjistruara zgjedhore dhe kandidatët e tyre për detyrimin për të bërë fushatë duke respektuar Kodin Zgjedhor.

“Sot nis fushata zgjedhore për zgjedhjet e pjesshme për kryetarin e bashkisë Shkodër, Dibër, Vorë, Durrës, Rrogozhinë, Lushnjë. Subjektet zgjedhore të regjistruara dhe kandidatët e tyre, kanë detyrimin për të bërë fushatë duke respektuar Kodin Zgjedhor, si edhe çdo normë tjetër ligjore, e cila përcakton dhe garanton zgjedhje të lira, të drejta dhe të ndershme,” thekson Ilirja Celibashi në nisje të fushatës.

Ndryshe, në zgjedhjet e 6 Marsit, sipas KQZ, në 6 bashki janë të regjistruar 648.536 zgjedhës që do të votojnë në 13 KZAZ dhe 940 Qendra Votimi.

Në garën për 6 kryetarë të bashkive, Shkodër, Dibër, Vorë, Durrës, Rrogozhinë dhe Lushnjë, janë regjistruar 20 kandidatë.