Zgjedhjet lokale, Rama me drejtues të ri politikë, Ahmetaj zhveshet edhe nga partia

Pas mbledhjes së Kryesisë së PS, Kryetari Edi Rama e bëri të qartë se Partia Socialiste filloi punën për zgjedhjet lokale ndërkohë mësohet se për ealizimin e synimeve të tij ai do të ketë një skuadër të re organizative në qarqet Shkodër, Vlorë dhe Kukës.

Kështu, drejtues politikë në Qarkun Vlorë më nuk do të jetë Arben Ahmetaj por Blendi Klosi, nga Qarku Kukës ikën Safet Gjici dhe u emërua Pandeli Majko, ndërsa drejtues politikë nga Qarku Shkodër ikën Edona Bilali dhe u emërua Elisa Spiropali.

“Kemi nisur punën për zgjedhjet vendore dhe tani kemi hyrë në fazën e dytë të procesit të organizimit për të cilin kemi folur sot. Kjo vjen në një kontekst shumë të jashtëzakonshëm për shkak të situatës ku ndodhet bota e sidomos Europa. Inflacioni i luftës është një forcë e madhe që ka marrë hov duke prekur të gjithë por ne kemi detyrën të bëjmë gjithçka që është e mundur që pa shkatërruar ekuilibrat financiarë të vendit të lehtësojmë këtë dhimbje, pjesë e kësaj është edhe komunikimi i vazhdueshëm. Ky ishte thelbi i takimit të sotëm,” u shpreh Edi Rama pas mbledhjes së Kryesisë së PS ndërsa i pyetur pse Arben Ahmetaj nuk do të jetë më drejtues politik i Qarkut Vlorë për PS, ai theksoi se emrat nuk kanë rëndësi.

“S’ka asnjë rëndësi të hyjmë në emra. Jemi shërbëtorë të këtij misioni. Secili ka misionin e vetë. Kjo është skuadër dhe çdo skuadër ka rolin e ndryshëm dhe të gjithë bëjnë rolin e tyre.”

Ndryshe, data e zgjedhjeve sipas socialistëve në pushtet do të jetë mes 15 prillit e 15 majit të vitit 2023, dhe pritet që Presidenti i Republikës, Bajram Begaj, të dekretoj datën të cilën do ta përcaktojë shefi i tij, Edi Rama!