Zgjedhjet në Mal të Zi, DPS e Gjukanoviç e para me 35%, shqiptarët me 2 deputetë

Pas përpunimit të 89% të votave të numëruar, Qendra për Monitorim dhe Hulumtim, CEMI, ka dhënë rezultatet paraprake të zgjedhjeve parlamentare në Mal të Zi: Odlučno za Crnu Goru: DPS – Milo Gjukanoviç – 34,8%, Za Budućnost Crne Gore – 32,7%, Mir je naša nacija – 12,5%, Crno na bijelo – 5,7%, Bošnjačka stranka – 4,2%, Socijaldemokrate – 4,1%, SDP Jaka Crna Gora – 3.1, HGI Svim srcem za Crbu Goru – 0.2%, Hrvatska Reformaska Stranka, HRS – 0.1.

Në këtë garë dy koalicionet shqiptare, sipas CEMI kanë marrë: Koalcioni shqiptar ”Bashkë nji za” listë të cilës i prin Fatmir Gjeka 1.1% dhe Lista Shqiptare Genci Nimanbegu – Nik Gjeloshaj të cilës i prin Nik Gjeloshaj 1.4%.

Ndërkohë Qendra për Tranzicion Demokratik, CDT, ka bërë të ditur se sot në në zgjedhjet për parlamentin e ri të Malit Zi kanë votuar 409.880 qytetarë ose 75.9 për qind ndërsa shtoi se në zgjedhjet parlamentar të vitit 2016 pjesëmarrja ishte 73.4 për qind, e në vitin 2012 ishte 70.6 për qind.

Kryetari i KQZ të Malit Zi, Aleksa Ivanoviç, duke bërë ditur se faqja e tyre zyrtare ishte sulmuar disa herë gjatë mbrëmjes por tani gjithçka është në rregull, tha se sot n zgjedhjet parlamentare pjesëmarrja ishte 74.16 për qind.

Presidenti i Malit të Zi, Millo Gjukanoviç, tha pas votimit se nuk ka rrezik për stabilitetin e shtetit dhe sigurinë e qytetarëve, ndërsa tensionet, sipas tij, vijnë nga adresa jashtë Malit të Zi.

“Shoqëria malazeze ka kaluar nëpër tundime të tilla disa herë, andaj nuk shoh ndonjë rrezik për stabilitetin e Malit të Zi dhe për sigurinë e qytetarëve,” tha Gjukanoviç.

Ndryshe, në garën për 81 ulëse në parlament ishin 11 lista zgjedhore, 5 parti dhe 6 koalicione.

Të drejtën e votës në Mal të Zi e kanë 540.026 qytetar të cilët kanë votuar në 1.217 qendra votimi. Qendrat e votimit janë hapur në orën 7:00 ndërsa janë mbyllur në orën 20:00.