Zgjedhjet në PD, sot 8 Degë me Kryetar të ri, anulohen zgjedhjet në Malësi të Madhe.
Komisioni i Organizimit dhe Kontrollit të Operacioneve Elektorale të Partisë Demokratike njofton se është mbyllur procesi zgjedhor për zgjedhjen e kryetarëve në 8 Degë të PD, dhe pas numërimit të fletëve të votimit u shpallën dhe fituesit:
– Kryetar i PD Dega Shkodër, Gjenarin Ndoc Kapcari me 47% të votave.
– Kryetar i PD Dega Korçë, Devis Xhezar Osmani me 48% të votave.
– Kryetar i PD Dega Peqin, Mustafa Zylyf Pashja me 50.6% të votave.
– Kryetar i PD Dega Mirditë, Albert Dod Mëlyshi me 56% të votave.
– Kryetar i PD Dega Vau i Dejës, Benard Gjon Ndreca me 69% të votave.
– Kryetar i PD Dega Mirditë, Arben Mëlyshi me 56% të votave.
– Kryetar i PD Dega Lezhë, Arben Llesh Ndoj 578 vota nga gjithsej 784 vota.
– Kryetar i PD Dega 7 Tiranë, Avni Ram Tobli me 46% të votave.
Ndërkohë Komisioni i Organizimit dhe Monitorimit të Operacioneve Elektorale, pasi është vënë në dijeni të ngjarjeve të rënda që kanë ndodhur sot, gjatë procesit të votimit për kryetar në PD Dega Malësi e Madhe, ka vendosur anulimin e zgjedhjeve.
“Komisioni i Organizimit dhe Monitorimit të Operacioneve Elektorale është në procesin e mbledhjes dhe verifikimit të të gjitha fakteve dhe ndodhive që çuan në prishjen e procesit të votimit për të cilat do të shprehet me një vendim zyrtar,” thekson Komisioni përmes një njoftimi duke vlerësuar se integriteti, transparenca si dhe vota e lirë e anëtarëve është primare në këtë proces të rëndësishëm të rithemelimit të Partisë Demokratike.
Sot Komisioni i Organizimit dhe Kontrollit të Operacioneve Elektorale të Partisë Demokratike gjithashtu ka bërë të ditur se pas shqyrtimit të materialeve zgjedhore të ardhura nga PD Dega Gramsh, ka shpallë Kryetar Kodhel Tefik Calën me 38.5% të votave.
Ndryshe, Komisioni i Organizimit dhe Kontrollit të Operacioneve Elektorale falenderon të gjithë anëtarët që u bënë pjesë e procesit të votimit për zgjedhjen e Kryetarit të degës së tyre sipas parimit “një anëtar një votë”, për një Parti Demokratike më të bashkuar, më të fortë e më të hapur.
