Zgjedhjet në Serbi, Gjermania: Parregullsi të papranueshme për një vend kandidat të BE-së
Parregullsitë në zgjedhjet në Serbi, të raportuara nga misionet vëzhguese ndërkombëtare, janë të papranueshme, për një shtet kandidat për anëtarësim në Bashkimin Evropian, u shpreh Ministria e Punëve të Jashtme e Gjermanisë në reagimin e saj pas përfundimit të procesit zgedhor dhe vlerësimit të OSBE-ODIHR.
“Serbia ka votuar, por Organizata për Siguri dhe Bashkëpunim në Evropë, OSBE, dhe Zyra për Institucione Demokratike dhe të Drejta të Njeriut, ODIHR, kanë raportuar për abuzime të burimeve publike, frikësim të votuesve dhe raste të blerjes së votave. Kjo është e papranueshme për një shtet që e ka statusin e vendit kandidat për anëtarësim,” shprehet Ministria gjermane në reagimin përmes rrjetit social X.
Zyra për Institucione Demokratike dhe të Drejta të Njeriut, tha se zgjedhjet në Serbi janë përcjellë me parregullsi serioze, keqpërdorim të fondeve publike, dominim medial të presidentit të shtetit, Aleksandar Vuçiç, fushata negative dhe përhapje të frikës.
Vëzhguesit ndërkombëtarë dhe misioni i OSBE-së, kanë qenë pjesë e misioneve vëzhguese të zgjedhjeve në Serbi.
“Këto janë probleme serioze që institucionet duhet t’i adresojnë dhe hetojnë seriozisht, në mënyrë që të krijohen kushte për zgjedhje të drejta dhe demokraci më të fortë në Serbi, në të ardhmen,” tha OSBE, në një konferencë për media, të mbajtur më 18 dhjetor.
Sa u përket parregullsive në ditën e zgjedhjeve, ODIHR ka thënë se janë vërejtur votime në grup dhe shkelje të privatësisë së votës.
“Ne kemi parë parregullsi serioze, përfshirë blerje të votës,” thanë përfaqësuesit e vëzhguesve ndërkombëtarë, më 18 dhjetor.
Dyshimeve për parregullsi në zgjedhje u ka bërë jehonë edhe një pjesë e opozitës.
Partitë e koalicionit opozitar “Serbia kundër dhunës”, kanë thënë se në zgjedhjet lokale në Beograd ka pasur shumë parregullsi, dhe se rezultatet nuk e reflektojnë vullnetin e qytetarëve.
Me ftesë të tyre, disa banorë të Beogradit kanë marrë pjesë në një protestë, më 18 dhjetor, duke kërkuar anulimin e zgjedhjeve në kryeqytetin serb.
Partia Përparimtare Serbe, SNS, e Presidentit Vuçiç, i ka hedhur poshtë akuzat për rezultati ndryshe prej vullnetit të qytetarëve, dhe parregullsi tjera.
Disa misione vëzhgimi vendore në Serbi, kanë hedhur dyshime edhe për rezultatin e zgjedhjeve parlamentare, duke thënë se janë regjistruar shkelje drastike.
Më 17 dhjetor, Serbia i ka organizuar zgjedhjet parlamentare, lokale dhe krahinore.
Partia e Vuçiqit, SNS, ka shpallur fitore në të gjitha nivelet./RFE/
