Zgjedhjet parlamentare në Kosovë, nesër votohet në përfaqësitë diplomatike

Nesër në përfaqësitë diplomatike të Kosovës, do të zhvillohet votimi për zgjedhjet parlamentare. KQZ ka bërë të ditur se të gjitha qendrat e votimit hapen në orën 07:00 dhe do të mbyllen në orën 19:00, sipas kohës lokale të çdo shteti.

Komisioni Qendror i Zgjedhjeve ka sqaruar se vetëm 19.187 votuesit e regjistruar në 29 përfaqësi diplomatike do të mund të votojnë më 27 dhjetor, pasi në listën votuese, e cila do të përdoret në këto përfaqësi diplomatike, janë vetëm emrat e shtetasve që kanë përzgjedhur këtë mënyrë votimi kur janë regjistruar si votues jashtë Kosovës gjatë periudhës së regjistrimit.

Procesi i votimit do të zhvillohet në 40 vendvotime që u përkasin 16 ambasadave dhe 13 konsullatave të Republikës së Kosovës, të cilat janë të vendosura në 18 shtete të ndryshme.

KQZ ka bërë të ditur se verifikimi i statusit mund të bëhet në çdo kohë përmes platformës elektronike:  https://diaspora.kqz-ks.org/sq/AbroadVoter/AbroadVoterStatuses