Zgjedhjet presidenciale në Mal të Zi pa surpriza, Gjukanoviç e Milatoviç në raundin e dytë

Ashtu siç parashikuan sondazhet edhe rezultatet paraprake të zgjedhjeve presidenciale të 19 Marsit në Mal të Zi konfirmuan se garën për President më 2 Prill do ta vazhdojnë Presidenti aktual Milo Gjukanoviç dhe përfaqësuesi i Lëvizjes Europa Tani, PES, Jakov Milatoviç, të cilët në raundin e parë morën 35.3 për qind përkatësisht 29.2 për qind të votave

Përveç Milo Gjukanoviçit dhe Jakov Milatoviçit, Qendra për monitorim dhe hulumtim, CeMi, raporton se pas numërimit të 99.7 për qind të votave, lideri i Frontit Demokratik proserb, DF, Andrija Mandiç mori 19.1 për qind të votave, përfaqësuesja e Partisë Socialdemokrate, SDP, Draginja Vuksanoviç Stankoviç 3.2 për qind, kryetari i Demokratëve Aleksa Beçiç 10.09 për qind, lideri i Malit të Zi të Bashkuar, Goran Daniloviç ,14 për qind dhe kandidati Jovan Raduloviç 0.8 për qind.

Ish-ministri i Ekonomisë, Jakov Milatoviç, i cili do jetë përballë Milo Gjukanoviçit në raundin e dytë më 2 Prill dh enuk konsiderohet surprizë e këtyre zgjedhjeve, u bë i njohur me rritjen e pagës minimale nga 220 në 450 euro dhe afirmitetin e dëshmuar me Kishën Ortodokse Serbe kur u bë dhe ministër në Qeverinë Krivokapiç, ndërsa gëzon dhe mbështetjen e kryeministrit aktual, Dritan Abazoviç.

Duke e kosnideruar fitore të demokracisë si fushatën zgjedhore, ditën e zgjedhjeve ashtu dhe shpalljen e rezultatit, Kryeministri në detyrë, Dritan Abazoviç nuk fshehu kënaqësinë edhe për “largimin” e Gjukanoviçit dhe DPS-së.

“Tani vetëm duhet ruajtur klimën e mirë politiko-shoqërore dhe më 2 Prill të kompletohet edhe një etapë e zhvillimit demokratik të shtetit. Edhe një herë u dëshmua se Mali i Zi mundet dhe që të gjithë jemi në rrugën e drejtë! Me qetësi dhe krenari në fitore të reja,“ thekson Abazoviç i bindur pas këtijë rezultati fitorja e Jakov Milatoviçit është e padiskutueshme.

Ja si u votua në raundin e parë, në tri rajone të Malit të Zi, për Gjukanoviçin dhe Milatoviçin:

Në Veri, sipas Qendrës për monitorim dhe hulumtim, CeMi, Milo Gjukanoviç i DPS arriti të marrë të zgjedhjet e 19 Marsit 2023, 37.6 për qind ndërsa Jakov Milatoviç i PES, 23.8 për qind të votave.

Në Qendër, Milatoviç mori mbështetjen e 35.1 për qind të qytetarëve që votuan dje ndërsa Gjukanoviç 31.9 për qind.

Ndërsa në Jug, Gjukanoviç u votua nga 37.3 e qytetarëve ndërsa Milatoviç 23.6 për qind.

Ndryshe në zgjedhjet Presidenciale të 19 Marsit në Mal të Zi votuan 344.700 votues ose 63.6 për qind.