Zgjedhjet vendore, Berisha: Do marrim pjesë në 6 bashki, kandidatët do zgjedhen nga anëtarët e PD

Lideri historik i demokratëve, Sali Berisha, ka bërë të ditur sot se Komisioni i Rithemelimit të Partisë Demokratike ka vendosur që të marrin pjesë në zgjedhjet e pjesshme vendore të 6 Marsit për kryetar në bashkitë Shkodër, Dibër, Durrës, Vorë, Rrogozhinë dhe Lushnjë me kandidatët që do të përcaktohen nga anëtarësia e PD.

“Do të bëhen zgjedhjet në struktura dhe kandidatët më të votuar do të jenë zyrtarisht kandidatë. Qytetari vendos se kush do të jetë kandidat, as Sali Berisha, as Kryesia, askush tjetër. Ky proces është i ngjashëm me primaret në SHBA dhe është i dëshmuar si më i suksesshmi, transparenti dhe besojmë se do të sjell rezultatet më të mira për ne,” thekson Sali Berisha në sqarimin e tij përmes rrjetit social Facebook duke ftuar të gjithë anëtarët e PD që të bëhen pjesë e këtij procesi për t’i dhënë legjitimitetin e duhur secilit kandidat ndërsa përfundon:

“Lista jonë padyshim se do të jetë listë fituese e këtyre zgjedhjeve të jashtëzakonshme në secilin kuptim të fjalës.”

Reagimi i plotë:

Të nderuar miq, më lejoni që në hapësirën për komente të tregoj pozicionin tonë për zgjedhjet e pjesshme vendore të 6 marsit

1. Ne kemi vendosur që në këto zgjedhje për kryetar në bashkitë Shkodër, Dibër, Durrës, Vorë, Rrogozhinë dhe Lushnjë të marrim pjesë.

2. Kandidatët tanë do t’i përcaktojnë anëtarët. Pra, do të bëhen zgjedhjet në struktura dhe kandidatët më të votuar do të jenë zyrtarisht kandidatë.

3. QYTETARI vendos se kush do të jetë kandidat, as Sali Berisha, as Kryesia, askush tjetër.

4. Ky proces është i ngjashëm me primaret në SHBA dhe është i dëshmuar si më i suksesshmi, transparenti dhe besojmë se do të sjell rezultatet më të mira për ne.

5. I ftoj edhe njëherë të gjithë anëtarët që të bëhen pjesë e këtij procesi për t’i dhënë legjitimitetin e duhur secilit kandidat.

6. Lista jonë padyshim se do të jetë listë fituese e këtyre zgjedhjeve të jashtëzakonshme në secilin kuptim të fjalës.